Biak-ina mi tibuaitu pathum man an ni

July 17, Thawhlehni zan dar 9 hma deuh khan Khatla East-a Salvation Army corps biak-ina corps band hla zir lai chu B Thangtinliana leh a fate'n tibuaiin, kut an thlak a; B Thangtin­liana te hi man nghal niin, nimin tlai khan jail-ah dah luh an ni.

Police hotute hnen aṭanga thu dawn danin, Thawhlehni zan dar 8:30 velah Benjamin Lalruata (37) s/o B Thangtinliana chuan an in bul chiaha Salvation Army biak-ina hla zir mek, mipa pathum leh hmeichhia pakhatte chu an bengchhen avang­in titawp turin a hrilh a, hla zir mekte pawhin an zawh ṭep thu an lo hrilh hnuah a chhuak leh nghal a ni.

Minute 10 vel hnuah Benjamin Lalruata chu hla zirnaah chuan kal lehin, an hla zir titawp turin a ti leh a; hla zir zinga mi John-a chuan an zir zawh ṭêp thu sawiin a chhuahpui a, páwna an chhuah hnuah Benjamin Lalruata chuan John-a chu a kut a thlak ta mai a, an intibuai zui ta a ni.

Kut inthlak hnuah ṭhenawm khawveng mipui an pungkhawm nghal a, khawtlang hruaitute'n bân an phar avangin buaina lian zawk a chhuak lo.

He thilah hian Benjamin Lalruata bakah, amah puitu a pa B Thangtinliana (70) s/o A Sapchhawna (L) leh John Lalhruaitluanga (19) s/o James Remruata te chu police-in an man nghal a; an lakah IPC Section 34 (a huhoa tum thu­hmun neia mi tihbuai), 296 (sakhaw thila mi thil tilai tihbuai), 323 (duh vang renga mi tihnat/kutthlak) leh 452 (mi ina luta mi tihbuai leh kutthlak) hmangin thubuai an ziak lut.

B Thangtinliana, Benjamin Lalruata leh John Lalhruaitluanga te hi nimin khan Court-ah hruai an ni a, Court chuan judicial custody-a awm turin a ti a, nimin tlai khan jail-ah dah luh nghal an nih thu police hotute chuan an sawi.