Ni 23 chhung sikul pakua khâr a ni tawh ; Sikul leh pisa zawng zawng khâr an tum

MIGLAHSSA, School Managing Boad leh Joint Students Union (SU)-te chu nimin khan Aizawlah an inhmukhawm a; an thil phûtah July 25, 2018 thlenga thu lawmawm an hmuh loh chuan an khua ṭheuha sorkar pisa leh sikul zawng zawng tiamchin awm loa khâr bakah, kawngpui dan an tum thu an puang. Lumpsum aided HSS pakua chu khâr a ni mek a, ni 23 chhung khâr a ni tawh.

Mizoram Government Lump­sum Grant-in-Aid Higher Secondary School Asso­ciation (MIGLAHSSA)-ah hian khaw pakuaa lumpsum aided higher secondary school (HSS) pakuate an tel a; MIGLAHSSA-te nena nimina meeting-a tel School Managing Board tih hi HSS pakua awmna khuaa Managing Board-te niin, Joint SU tih pawh hi khaw pakuaa SU-te an ni.

Nimina meeting-ah hian resolution an pass a; lumpsum aided HSS pakuate adhoc grant-in-aid dinhmuna dah an phûtnaah, Mizoram sorkar chu July 25, 2018 thleng nghah an rèl thu tarlangin, "Thu lawmawm kan dawng lo a nih chuan July 26 aṭanga August 3, 2018 chhung Zawl­nuam, Sawkawrdai, West Phaileng, Phullen, Farkawn, Thingsulthliah, East Lungdar, NE Khawdungsei leh Zobawk-ahte sorkar office leh sikul awm zawng zawng tiamchin awm loa khâr leh road block a ni ang," an ti.

Sikul leh sorkar pisa zawng zawng khar leh kawng dan pawhin awmzia a neih loh chuan, khaw pakuaa zirlai pawl inzawmkhawmte'n hma an la chhunzawm zel dawn tih an tarlang bawk.

Lumpsum aided HSS pakuate adhoc aided-a hláng kai tura sorkar nawr nan MIGLAHSSA leh school managing board-te chuan June 18, 2018 aṭangin tiam chin awm loin HSS pakuate chu an khar tawh a; Inrinni, Pathianni holiday dang tel loin nimin kha ni 23 sikul an kharna a ni tawh. Sikul khâr avang hian HSS pakuaa zirlai 850 vel chu first term exam nei ve thei loin an awm mek a ni.

MIGLAHSSA, Maganing Board leh Joint SU-te joint resolution chuan, chawlhkar li chuang sikul khar a nih hnu leh first terminal examination pawh hmachhawn thei loa zirlaite an awm avangin zirlaite leh an nu leh pate an mangang a, zirtirtute tan pawh a luhai thlak tak zet tih an tarlang a, "Kan mamawhna leh kan harsatziate hi sorkar hian min hriatthiampui se kan duh tak zet. Sorkar hi a phur zawh loh nghawngkawl bahtir kan tum lo a, sorkarah min dah turin kan phût lo a, adhoc grant-in-aid-ah tal min dah kan duh a ni," a ti.

Dinhmun ṭha zawka dah phût vanga sikul khar mekte hi Tuisualral HSS, Phullen HSS, Farkawn HSS, NE Khawdungsei HSS, East Lungdar HSS, Thing­sulthliah HSS, Zobawk HSS, West Phaileng HSS leh Zawl­nuam HSS-te a ni.