Mi kut thlaktu officer suspend

Pathian thu sawia kal kual ṭhin K Remsangpuia (20), Kulikawn, July 9, 2018 zan dar 9 vela Kulikawn, Aizawla kutthlaktua puh, H Lalsiamliana (50 vel) chu a thawhna PHE department-in a suspend dawn nia thu dawn a ni. H Lalsiamliana hi PHE department-a executive engineer a ni.

Vanglaini zawhna chhangin Public Health Engineering (PHE) secretary KT Beicho executive engineer chuan, H Lalsiamliana man a nih chungchang leh a laka thubuai ziah luh a nih thu hi Aizawl SP hnen aṭangin ziakin hriattirna an dawng tih a sawi.

KT Beicho chuan, "Action kan la nghal a, darkar 48 aia rei police custody-ah a awm avangin amah suspend-na tur kan buaipui nghal a, PHE Minister pawhin a approve (pawmpui) tawhin ka hria," a ti. Thu dawnna pakhat chuan, H Lalsiamliana suspension order a chhuak tawh niin a sawi bawk.

Tarlan tawh angin, H Lalsiamliana hian K Remsangpuia kut a thlak avangin police-in an man a, K Remsangpuia nau, F Lalrinchhana'n FIR a thehlut bawk a; Kulikawn Police Station-ah IPC Section 295A, 324, 341, 341 leh MLPC Act Section 43(A) hmangin thubuai ziah luh a ni.

The Central Civil Services (Classification, Control & Appeal) Rules, 1965-a Rule 10-ah sorkar hnathawk, criminal case neite chungchanga sorkarin action a lak dan tur leh suspend dan tur a chuang a; sorkar hnathawkte chu eng dan hnuaiah pawh criminal case an nei a nih a, police custody emaw, judicial custody-ah emaw darkar 48 leh a aia rei an awm a nih chuan suspend tur, tih a ni.