Mizoram sorkarin Inremna angin Bru hruai kîr hna a thawk dawn
Mizoram sorkar chuan Ministry of Home Affairs (MHA), Mizoram sorkar, Tripura sorkar leh Mizoram Bru Displaced People Forum (MBDPF) ten inremna an ziah angin Tripura relief camp-a Mizoram Bru-te hruai kîr hna a thawk dawn.
Vanglaini palai zawhna chhangin Home secretary Lalnunmawia Chuaungo chuan, inremna, Darft Agreement aṭangin MBDPF inhnûkdâwk mah se, Bru hruai kir tura inbuatsaihna an chawlhsan loh thu a sawi a, "Hruai kir hna thawk turin kan inbuatsaih zel. Haw duh lote chu an haw lo mai ang a, a duhte chu kan hruai kir mai dawn a ni. MBDPF inhnudawh hnuah sorkar laipuiin aṭangin thu dawn kan la nei lo," a ti.
Lalnunmawia Chuaungo chuan, sorkar laipui aṭangin Bru relief camp-a electoral roll revision buatsaih tura rawtna a awm thu sawiin, "Meeting-ah kan duh loh thu ka sawi chhuak a, roll revision neih chhung a rei lo a, an lo kir dawn tho avangin, an lo kir huna roll revision neih kan rawt a ni," an ti a; an rawtna chu Election Commission of India pawhin a pawm tâk thu a sawi.
Home Secretary chuan, Bru hruai kirte dawn ang Mizorama rawn lêt tawh Bru chhungkua 1,648-te'n an dawn ve ngei an duh thu sawiin, "Meeting-ah pawh hemi chungchang hi kan sawi chhuak a, agreement-ah telh kan rawt. Mahse, MHA lamin Monitoring Committee-in a la ngaihtuah theih tho avangin agreement-ah chuan ziah loh an tih avangin ziah lan a ni ta lo," a ti.
Bru relief camp-a awm ṭhenkhat, Mizoram khua leh tui dik tak endik ṭuma thlan ve loh, a hnua Mizoram khua leh tui dik tak nia inchhál an awm thu sawiin Lalnunmawia chuan, "Heng mite hian hruai kîr hna thawh hmaa endik hna thawh leh an duh. Mahse, hei hi kan duh bik lo a, hruai kîr hna kan thawk phawt ang," a ti a; hruai kîr hna thawh zawhna camp-ah endik hna an thawh chhunzawm zel tur thu a sawi.
Home Secretary chuan, Bru lo kir turte in hmun ft. 34X40 bakah, ran vulhna tur leh êk-in sakna hmun pek chungchangah, "In hmun bak hi chu pek ṭha kan ti lo a, meeting-ah pawh agreement aṭanga paih turin kan ti. Mahse, agreement-ah hian pek ngei ngei tur tih a ni lo a, 'Kan tum ang' tih a nih chauh avang leh MHA lamin min ngen nasat avangin telh a ni," a ti.
Lalnunmawia Chuaungo chuan, ruahmanna hmasaah chuan Bru hruai kîr hna chu September 30, 2018-ah thawh zawh tur a nih thu sawiin, "Kan ngaihtuah a, September 25-ah zawh ni se kan ti leh a ni. Mahse, ECI lamin September 27, 2018-ah final roll tlangzarh an duh avangin, September 10-ah hruai kîr hna thawk zo turin min ngen a, kan pawmsak ta a ni," a ti a; September 10-ah hruai kir hna thawh zawh ngei an tum thu a sawi.