KHAWTHLIR

Hnathawh dan zir
Nagaland sorkar chuan Higher Education leh School Education department-a thawk mi pali Aizawlah a rawn tír a, July 19-20 chhungin Mizoram Scholarship Board (MSB) hnathawh dan an zir dawn. Mizoramah hian nikum aṭang khan MSB chuan scholarship sumte zirlaite bank account-ah direct benefit transfer hmangin a thun a, kum 2017-18 scholarship chu July 2018 chhungin scholarship pek vek hman a tum. Nagaland sorkar pawhin kum 2017-18 scholarship a la pe chhuak lo a ni.

Rural mart hawng
Bilkhawthlir Farmer Producer Organization (FPO) member-te thar chhuah kuhva rah bakah, sangha chaw leh hlo túrte zawrhna tur Bilkhawthlira Rural Mart sak thar chu nimin khan Kolasib DC Dr Arun T-in a hawng.

Tuitla ruang hmu
July 17, 2018 tlaia Tlawng lui, Sairang Balukaia tla hlum Samuel Lalthlengliana (22) s/o Lalengvara (L), Sairang Dawrveng ruang chu nimin chawhma dar 10 vel khan a tlâkna aṭanga km. 10 vel hlá, Mualkhang ram zâwnah hmuh a ni a, nimin vêk khan vui a ni.

MDC thi
CADC-a member of district council (MDC) Pranab Kumar Chakma (58), chu Nilaini zan zanlai pelh hnu, dar 12:15 khan lungphul châwlin a thi. CADC IPRO Prabin Chakma tarlan danin, Pranab Kumar Chakma hi Ugudasury bial aṭangin MDC atan ṭum li thlan tlin a ni tawh a, kumin April thlaa CADC inthlanah khan MNF party aṭangin thlan tlin a ni. A thih hmain a hrilselna lamah insawiselna a neih loh thu a chhungte chuan an sawi.

Motor-in chil hlum
VL Remruata (33) s/o AK Day, Siaha chu nimin zing dar 4:40 vel khan Kolasib leh Thingdawl inkara Hmawngkhawthlir bulah thia chhar a ni. Kolasib Police hnen aṭanga thu dawn danin, VL Remruata hi zing dar 4:20 velah ATS Khuangpuilam-ah hmuh niin, zing dar 4:40 velah thia chhar a ni a, motor-in a chíl hlum ni ngeia hriat a ni. He thu ziah lai thleng hian VL Remruata chíl hlumtu man a la ni lo.