Agriculture Minister-in tractor a sem

Lo neitute hman tur tractor 30 leh lei lehna hmanraw pawimawh dangte nimin khan Agriculture minister KS Thanga'n Johnson Diesel Sales & Services Depot, Sihhmuiah a sem.

KS Thanga chuan, sorkar laipuiin India hmarchhaka lo neitute tan scheme ṭha tak a siam hnuaia hamṭhatna hai chhuak tura Agriculture department-a thawkte thawhrimna a fak a, "Mizoram hmun hrang hranga loneitute'n buh leh bâl thar tamna tura hmalaknaah sorkar an ṭawiawm ṭha ṭhin hi a lawmawm hle. Lei lehna khawl an dawnte hmang hian senso tlem zawk leh sâwt zawka lo neitute'n lei an leh a, an thar a pun ngei ka beisei," a ti.

Agriculture Minister chuan, Mizoramin khawl hmanga lo leh huan enkawl 'farm mechanization' ah hun eng emaw chen hma la tawh mah se, tun dinhmunah mechanization tehfungah Mizoram chu hectare khatah 0.84 kilowatt chauh a la nih thu sawiin, "Khawl hman harsatna hmun, tlang rama lo nei kan nih avangin hmasawn a harsa a, ṭan lak a la ngai nasa hle," a ti a; ṭhangthar lehkhathiam leh sumdawngte farm machinery lama sumdawnna huangah lut tam se a duh thu a sawi.

Sub Mission on Agricultural Mechanisation (SMAM) scheme hnuaiah sorkar laipuiin hmarchhak state-a loneitute tan thil chi hrang pariat a duang a, chumi hnuaiah chuan lo neitu intélkhawm Custom Hiring Centre (CHS) thar 30 tan tractor (horse power 47), tractor trailer (3Ton capacity), leilehna khawl rotavator blade 48 nei leh buh ahna kháwl self propelled paddy reaper pakhat zel pek a ni.

CHS pakhat zelah cheng nuai 10 thleng project siam theih a ni a, chuta 95% chu sokarin a tum a, a bak zawng chu lo neitu

intél khawmte'n an tum thung. CHS pakhat zel tan Rs. 11,13,000 sen niin, CHS 30 tan Rs. 3,33,90,000 sên a ni a, sorkar laipuiin Rs. 2,56,50,000, state sorkarin Rs. 28,50,000 leh lo neitute'n Rs. 48,90,000 an tum a ni.

CHS din thar 30-te hi Champhai district-ah 16, Serchhip district-ah pasarih, Aizawl leh Siaha district-ah pahnih ve ve, Kolasib, Lawngtlai leh Lunglei district-ah pakhat ṭheuh a awm.