MNF-in AMFU hruaitute SEDP an zirtir

MNF party chuan All Mizoram Farmers Union (AMFU) hruaitute pualin nimin khan Agriculture Directorate conference hall-ah MNF policy, Socio Economic Development Programme (SEDP) zirhona an buatsaih a; MNF vice president Dr R Lalthangliana chuan, SEDP hmangin Mizoram din chhuahtir ngei an tum thu a sawi.

Dr R Lalthangliana chuan, SEDP duang chhuak turin MNF chuan ngaihtuahna a sêng nasat thu a sawi a, "India ram mai ni loin, khawvel tukverhah dâkin he policy hi duan a ni a; he policy hmang hian Zoram din chhuahtir ngei kan tum a ni," a ti.

MNF Vice President chuan, kum 10 chhung MNF a sorkar laiin SEDP ang policy ṭha an la ­duang chhuak lo tih sawiin, "Mipui hnenah ngaihdam pawh kan dil a ni. Kan sorkar khan thil ṭha tam tak kan ti a, chutih laiin, kawng ṭhenkhatah árkhawthim dàia kalna chin kan nei, zêp thu a awm lo," a ti a; MNF an sorkar leh a nih chuan, kut hnathawktute dinchhuah ngei theihna turin SEDP hmangin hma an la dawn tih a sawi a ni.

AMFU general secretary Zion Lalremruata chuan, AMFU-in kum 20 chuang Mizorama kut hnathawktute dinchhuah nan hma an lak tawh thu a sawi a, "AMFU chu kut hnathawktu pawl inzawmkhawm a nih ang­in, kawng hrang hrangin sorkar a thawhpui ṭhin. Kut hnathawktute din­chhuahna tur kan thlir reng a, tun ṭumah pawh hian MNF-in SEDP a duan hi a chinchhuak deuh hlek­in kan hre duh a ni," a ti.

AMFU hruaitute hi MNF-a SEDP expert Dr Vanlalṭanpuia leh Dr C Lalsangzuala ten SEDP chungchang an hrilhfiah a ni.