Salvation Army hla zir tihbuai thu-ah Khatla khawtlangin thuchhuah an siam

Khatla leh Khatla East-a pawl hrang hrang telna Joint Committee chuan thuchhuah siamin, B Thangtinliana te chhungkua leh Salvation Army Khatla Corps member-te inkara buaina a chhuak chu pawi an tih thu an puang a; B Thangtinliana te chhungkua aṭanga an phûtte an tarlan rualin, mi dang tana bengchheng siam thei thilah kohhran leh pawlte an fimkhur a ṭul thu an tarlang.

Thuchhuahah hian Khatla East Local Council Chairman, Khatla East Welfare Chairman, Khatla Branch YMA President, Khatla Unit MUP President, Khatla Branch MHIP President leh Khatla YMA Section-II Leader ten hming an ziak a ni.

Khatla Joint Committee thuchhuak

1. Pathian biak-in leh hmunhma zah pahna nei hauh loa Benjamin Lalruata s/o B Thangtinliana'n Salvation Army Khatla Corps Hall luhchilh a, mi dang laka buaina siam a, thisen hial chhuak khawpa kut inthlakna a awm hi pawi kan tiin, hetiang thil duhawm lo hi thleng tawh lo se kan ti.

2. Pu B Thangtinliana ui vulh­te'n mi 15 chuang a seh tawh avang­in, an kawt zawnah pawh kal tlang ṭha ngam loa mi tam tak awm hi ṭha kan ti lo. Chuvang­in, an ui neihte hi kawl tawh lo se kan ti a, he kan duhna hi July 2018 chhung ngei hian tihlawhtling rawh se.

3. Veng chhung kohhran leh pawlte'n mi dangte tana beng­chheng leh hnawksak lo thei ang berin thâwm neih ṭhin ni se kan ti.

4. Pu B Thangtinliana te chhungkua leh Salvation Army Khatla Corps inkarah inremna leh boruak ṭha tak awm se ṭha kan ti hle a, hemi atan hian Joint Committee chuan a ṭul angin hmalak zel ni se kan ti.