Mizoram sorkarin bill a pek tlai avangin NEEPCO-in kawlphetha tihtawpah a vau ; Mizoram sorkarin niminah bill ba a pe tla

Mizoram sorkarin kawlphetha a leina pakhat, NEEPCO chuan Mizoram sorkarin kawlphetha leina man a pek tlai avangin Mizoram hnena kawlphetha pek lohah a vau. Hetihlai hian Mizoram sorkar chuan nimin khan kawlphetha man bate a pe tla.

NEEPCO chuan Mizoram sorkarin kawlphetha a leina man a pek tlai avangin kawlphetha pe tawh lo turin thutlukna a siam a. Ruahmanna an siam dan chuan December 10, 2021 aṭangin Mizorama kawlphetha an pek chu tihtawp an tum. Hetihlai hian Mizoram sorkarin a leibate a pek tak avang hian harsatna a thleng zui lo tura ngaih a ni.

Thudawn danin, Mizoram sorkar chuan NEEPCO aṭanga kawlphetha leina man ba pek tur chu nimin khan Treasury-in cheng vbc. 16.34 an clear sak a, cheng vbc. 16.4 hi letter of credit-ah dahluh nghal a ni.

Thuthar thehdarhtute zawhna chhangin Power & Electricity department hotute chuan kawlphetha man pek tlai chhan chu sorkar sum harsat vang a nih thu sawiin, "Kawlphetha leina atan hian kuminah cheng vbc. 300 dah a ni a, hei hian a daih lo," an ti.

P&E dept. hotute chuan kawl-phetha leina atana sum hman aiin, kawlphetha man aṭanga pawisa hmuh a tlem zawk ṭhin thu sawiin, "Hei hian sumah indaih lohna a siam ṭhin," an ti a, sorkarah pawisa an dil belh mek thu an sawi.

Company lamin kawlphehtha bill an rawn siam aṭanga ni 45 chhunga pawisa hi pektlak tur tih inremna awmsa angin kawlphehtha leina tur letter of credit-a sum dah lawk ṭhin a nih thu sawiin P&E hotute chuan, "Hemi aṭang hian bill chu an lo cut mai ṭhin. Tun ṭumah hian eng emaw harsatna avangin LC ah hian sum dah lawk a awm lo," an ti.

P&E dept. hotute sawi danin, Mizoram sorkar chuan hmun ruk aṭangin kawlphetha an lei ṭhin a, tuna NEEPCO hnena bill an pek theih loh ang hian company dang pek theih loh an nei lo.