Meiduma gas awmte la chhuak turin Kan inbuatsaih mek - Rajya Sabha MP

Rajya Sabha MP K Vanlalvena chuan, Mizoram sorkar chu company-te nen ṭanghoin sorkar laipui puihna ni bawk siin, Meidum, Kolasib district-a gas awmte la chhuak turin a inbuatsaih mek thu a sawi.

K Vanlalvena hian PRIDE, Lok Sabha, New Delhi-a training tura kal Mizoram Journalist Asso-ciation (MJA) member-te chu Delhi-a a chenna-ah Nilaini khan zanriah buatsaihsakin, Mizoram hmasawnna tura an hmalakna hrang hrangte a hrilh a ni.

Mizoram chhung hmun hrang hrangah company-te'n Mizoram sorkar leh sorkar laipui hriatpuiin gas leh oil zawn hna hun eng emaw chen an thawh tawh thu sawiin Rajya Sabha MP chuan, "Hmun ṭhenkhatah chuan a awm lo a niang tia han hlawhchham nate pawh an nei a, a ṭhenah erawh a zawn hna an thawk mek zel a ni," a ti.

K Vanlalvena chuan Meidumah ONGC-te'n natural gas an hmu chhuak ngei tih hriat a nih thu sawiin, "Mah se, India ram pumpui sumdawnna ang atan chuan gas a awm nia an hmuh chhuah zat hi a tam tawk lo deuh niin a lang. Chuvang chuan, ONGC-te'n a pipe-te hnawhin hlui hlawn ang deuhin an kalsan rih," a ti a, Meiduma gas awm lak chhuak hna chu tharthawh leh tura hmalak a nih thu a sawi.

ONGC-in an chhut dan chuan Meidumah hian gas billion cubic metre 2.28 awm tura ngaih a nih thu sawiin Rajya Sabha MP chuan, "Mizoramte chu ram zimte chhungkaw nuai 3 vel lek kan ni. Chuvangin, Meidum hmuna ONGC-ten gas a awm nia an hriat hi kum tam tak chhunga Mizoramin hmun dang a mi hmang miah loa kan chhit tham a ni tih a rin hriat theih tawh," a ti.

K Vanlalvena chuan Mamit bialtu MLA H Lalzirliana leh engineer-te nen sorkar laipuia a mawhphurtute an dawr thu sawiin, “Assam-in an gas thar chhuahte company nen ṭangruala an la chhuaka an hmang angin tih i tum ang u kan ti a ni. Delhi lama a concern department-te pawhin min lo phur pui hle,” a ti a, a concern minister pawhin hmanni lawkah min puih a inhuam thu Chief Mnister a hrilh thu a sawi.

Rajya Sabha MP chuan Ministry of Ports, Shipping and Waterways Minister hnenah Tlabung leh a chhehvel lui a pawnlang tial tial avang leh fur laiin khaw chhung a chim ṭhin avangin km. 30 vela thui lui mawnga river bad bawlhhlawh leh ṭiauvut haifai sak tura ngenna project a thehluh thu sawiin, “Niminah minister-in min rawn chhang a, hmala tura an inbuatsaih thu min rawn hrilh,” a ti.

Tlabung leh a chhehvel lui atana ruahmanna a siam chu a hlawhtlin ngei a beisei thu sawiin K Vanlalvena chuan, “A tak a lo thlen hma hi chuan thil ni ngei ngei tur anga lo sawi ngawt hi sawi sual palhte a hlauhawm ve a ni,” a ti a, tuna a tawn chinah chuan a lawmthu a sawi.

Rajya Sabha MP chuan Ministry of Road Transport hnenah Seling to Tuipang road double lane chu Tuipanga tawp loa, Lawngmasu-a tawp tura an ngen thu sawiin, “Kan ngenna min tihhlawhtlinsak dawn niin a lang. Lawngmasu kan tih chu Chhimtuipui lui kam khawchhak lam luikam tak tak a awm, lui kam khua Mara district ni si khaw piah ber a ni thung,” a ti.

Khawthlang tuipuiah Tlabung khaw thlang siah Khawthlangtuipuiah lei metre 200-a thui dawh tura an ngen thu sawiin Rajya Sabha MP chuan, “CPWD in DPR an siam zo vek tawh a, estimate te pawh an submit tawh,” a ti a, an ngenna hi a hlawhtling ngei dawna a lan thu a sawi.