KHAWTHLIR

MHIP-in chawimawi
MHIP gen. headquarters hruaitute chuan, nimin khan Mizo hmeichhe zinga High Court judge hmasa ber Marli Vankung chawimawina an hlan. MHIP president T Lalthangpuii chuan, MHIP thil tum, hmeichhiate chawikanna tihlawhtlingtu Marli Vankung chu chhuanawm a tih thu leh, a hnathawhna kawng tinrengah Pathianin finna leh chakna pe zel tura an duhsak thu a sawi.

Ambulance hlan
East Tuipui bialtu MLA Ramthanmawia chuan nimin khan a bial chhung Farkawn damdawiin (PHC)-ah SLT Infracon Private Ltd. Silchar in CSR hmanga ambulance an pek chu medical officer Dr Benjamin Lalramchuana hnenah a hlan

Lehkhabu tlangzarh
Assembly speaker Lalrinliana Sailo chuan, nimin khan Assembly conference hall-ah Hrangbana College Mizo department leh Research & Consultancy-te buatsaih Rokunga leh Zikpuii Pa (KC Lalvunga) kutchhuakte zirzauna Daingul-I leh Daingul-II tih lehkhabu a tlangzarh.

PMEGP thlirho
Mamit DC Dr Lalrozama hoin nimin khan DC conference hall-ah District Level Monitoring Committee on Prime Minister Employment Generation Programme (PMEGP) neih a ni a, PMEGP hnuaia hmalakna hrang hrang an thlirho.

Kawng khar
PWD-in December 31, 2021 thleng Rengtekawn leh Builum inkar Chemlui kawng siamṭhat hna an thawh dawn avangin, Kolasib SP chuan helai kawng hi khar a nih thu a puang. Huan lo ram neite tan bik kar tin Thawhṭanniah hawn a ni thung ang. Harsatna tawk emaw report tur neite chuan Kolasib Police Startion OC phone number - 9612467097 ah biak theih a ni.

MLA-in tlawh
Lunglei East bialtu MLA Lawmawma Tochhawng chuan December 8, Nilaini khan a bial chhung Dawn khua a tlawh a, YMA, MHIP, MUP leh Games & Sports Association te hnenah thilpek hrang hrang a pe.