MHSCS hnuaia bill ba tam tak awm hian MNF sorkar sawngnawizia a tarlang - MPCC

MPCC Media dept. chuan nimin khan Aizawl Press Club-ah thuthar thehdarhtute kawmin, Mizoram State Health Care Scheme (MSHCS) hnuaiah damlo bill pek theih loh eng emaw zat a awm thu tarlangin, "He harsatna hian MNF sorkar sawngnawizia leh sum leh pai enkawlna kawnga an hlawhchham zia a tarlang chiang hle," an ti.

MPCC Media chairman Dr Lallianchhunga chuan MSHCS chu April 1, 2008 ah din a nih thu sawiin, "Cheng vaibelchhe 50-in MNF sorkar khan bul a ṭan a ni. Amaherawhchu, khatih laia Health Minister fanute thawhna Bajaj Allianz-ah cheng vaibelchhe tam tak chu fortune plus’ policy hnuaiah Health Minister fate hlawk laihna turin annual premium anga dahsak an ni," a ti a, MSHCS chu a nih tur anga a kal theih loh thu a sawi.

December, 2008-a Congress-in sorkarna a siam pawhin kum bithliah neia Bajaj Allianz-a pawisa dah a nih avangin MSHCS chu an siamrem lawk theih bik loh thu sawiin Dr Lallianchhunga chuan, "Kalphung mumal awm loin harsatna a thleng nasa hle a, kum 2010-2011 chhunga bill tang chu bill thehluh zawng zawng aṭanga 35% a tling hial a ni," a ti.

Dr Lallianchhunga chuan mipuite harsatna sukiang turin Congress sorkarin MSHCS a siamṭha nia sawiin, "ADB aṭanga sum a hmuh cheng vbc. 117.80 leh health care sum hman bang, a vaiin cheng vbc. 149.6 chu kum 2010-11 atangin MHSCS sum bawmpui (Corpus Fund) atan a dah ta a ni," a ti a, sum peipun hna chu Finance department kutah hlan a nih thu a sawi.

MPCC Media Chairman chuan Congress sorkar laiin MSHCS hmangin a thlawnin damlo sang tam tak enkawl an nih thu sawiin, “Medical reimbursement-ah harsatna lian tham an tawk ngai lo,” a ti. Kum 2018-a MNF sorkar thar a pian tirhin Congress-in health care a kalpui aia ṭha zawka kalpui an tum thu an aupui nasa hle nia sawiin Dr Lallianchhunga chuan, “Mah se, Congress sorkarin MSHCS Corpus Fund a lo siam aia ṭha kalphung dang siam belh a nei meuh lo,” a ti a, MNF chuan natna cover tam tir an tum avangin cheng vbc. 70 an dah belh thu a sawi.

MPCC Media Chairman chuan kum 2011 aṭanga Corpus Fund atana dah cheng vbc 149.6 pung leh medical reimbursement bang inkhawlkhawm hi a tam chho zel tih sawiin, “Kum 2018 a sorkar a inthlak khan health care-ah hian cheng vbc. 155 vel a tling khawm hman a ni. Corpus Fund hi Finance dept.-in bank paliah investment a tih vangin vbc. 220 vel a tlingkhawm tawh a ni,” a ti.

MPCC Media chuan MSHCS Corpus Fund pung aṭanga damlo bill hi pek tur a nih avangin MNF-in ruahmanna an siam leh sum dah a inmil thei ta lo nia sawiin, “Budget-ah pawisa an dah belh bawk si loh avangin an talbuai ta a, bill tang tam tak a siam phah ta a ni,” a ti a, health care bill tang cheng vbc. 40 vel awmin, chhungkaw tam takin an tawrh phah thu a sawi.

November 13, 2021-ah ZPM Legislature Party chuan ‘Congress sorkar tharin health care a ngaihsak zui lutuk loh avang khan a nih tur ang a ni pha ta meuh lo’ tia press statement an siam thu sawiin MPCC Media chuan, “ZPM Legislature Party thuchhuah hi mak kan ti hle. Dik ber leh ṭha ber anga in ngai party hian thuchhuah an siam hmain sorkar kalphung leh hmalaknate zir chiang hmasa ṭhin se,” an ti.

MPCC Media tarlan danin, Congress sorkar kha health insurance lamah a thawk ṭha hle a, nasa takin health care system a siamṭha a, National Family Health Survey 2015-2016 chuan India hmarchhakah Mizoram chu health insurance lama thawk ṭha berah a puang a ni.