An thil phût a hlawhtlin loh chuan NHM-a thawkte nawrh an tum

National Health Mission Employees Union Mizoram (NEUM) executive nimina ṭhukhawm chuan resolution chi hrang pali siamin, an thil phûtte tihhlawhtlin a nih loh chuan nawrh an tum.

NEUM chuan an thil phutah December 15, 2021 ral hma ngeia thu lawmawm hmuh an phut thu tarlangin, "Thu lawmawm kan hmu lo a nih chuan keini chuan nawrh bak tihtheih neiin kan inhre tawh lo. Mipuiah harsatna nasa tak a thleng a nih pawhin khawngaiha min lo hrethiam turin kan ngen lawk a che u," an ti.

NEUM resolution pass-te :
 NHM hnuaia thawkte hi sorkarin a ngheta min lak thuai theihna turin Cabinet meeting-in a rang thei ang berin min ngaihtuah rawh se. Hemi atan hian kan Health Minister zahawm tak hian Cabinet meeting-ah min put luh sak rawh se. Sorkarah equivalent post ruak a awm lo a nih pawhin sorkarin department post ruak a neih sa hmang hian siam rem se la, a tam thei ang ber NHM staff aṭang hian hnawh khah ni rawh se.
 NHM contractual employee-te'n hun lo kal zel turah a hun taka hlawh kan lak ve zel theihna turin Mizoram sorkar Finance department hian NHM central share pawisa lo kal hi Ministry of Health and Family Welfare financial guidelines awm sa angin ni 15 ral hmain state sorkarin department hnenah pe chhuak ve zat zat tawh se. Tun dinhmunah pawh kum 2020-21 (FY) central share pek kim a la ni lo a, state matching share pawh a la pe kim lo a, hei hi December 15, 2021 ral hma ngeiin pe chhuak vek rawh se. Tunah hian state-in rem a tih a, a duh chuan NHM central share hi direct funding a dawn theih dan a awm a, hei hi state sorkar hian remti ngei rawh se.
 NHM employee-ten medical reimbursement pangngai an enjoy ve leh theihna atan sorkarin ruahmanna min siamsak rawh se.
 Health department hnuaia hna lak zawng zawngah NHM hnuaia contractual staff-te an lo thawh tawhna leh rural posting hian weightage a zavaiah nei tawh rawh se. Hei hi department-in a kalphung tur mumal takin min duansak bawk rawh se.