Forest minister-in officer-te a kawm

Environment, Forest & Climate Change (EFCC) minister TJ Lalnuntluanga hoin nimin khan PCCF conference hall-ah Senior Forest Officers’ Meeting neih a ni a, division hrang hranga hmalaknate an thlirho.

TJ Lalnuntluanga chuan Nagar Van Yojana chu municipality area chauh ni lo, notified town area-ah kalpui a ni thei dawn chu vannneihthlak a tih thu a sawi a, “Dampa Tiger Reserve atana sum kan dawn tur ang kan dawn loh avanga hnathawktute hlawh pek chungchanga harsatna te pawh sum nawr chhuah a ni hi a lawmawm hle,” a ti a, EFCC department in a vawikhatna atan Externally Aided Project - JICA a dawng tur chu chhinchhiah thlak a tih thu a sawi.

Department in hma a sawn dawn chuan working plan ṭha neih a pawimawh thu sawiin EFCC Minister chuan,”PCCF office-a working plan north leh south-in duang mai lo hian division tinten kan mawhah dah hi a ṭul hle. Forest Fire Management Plan-ah hian awmze nei taka APO siam a ṭul a, DFO-te’n an bial APO hi siam se ramkang nasa takin a vengin kan mamawh ang sum kan hmuh theih ka beisei,” a ti.

TJ Lalnuntluanga chuan, sum indaih lohna a awm ṭhin avangin contingency fund awm theih dan te, plan ang diak diaka thil a kal loh avangin emergency atana hman tur contingency expenditure siam te, kang ṭhelhna hmanrua hrang hrangte khawtlang leh NGO-ten an mamawh ang ngaihtuah sak theih dan kawng dapte leh ramngaw venhim chungchangah a tam thei ang ber public intervention leh contribution neih te ṭul a tih thute a sawi bawk.