MIZOFED Ruby Jubilee an lawm

Cooperation minister C Lalrinsanga chuan nimin khan Cooperative Marketing and Consumers Federation Limited (MIZOFED) kum 40 tlin Ruby Jubilee lawmna a hmanpui a, MIZOFED chairman lo ni tawh Turial bialtu MLA K Laldawngliana chu khualzahawm a ni.

MIZOFED hi December 9, 1981 khan Mizoram Wholesale Cooperative Stores Ltd., Mizoram Apex Marketing Society Ltd., leh Mizoram Cooperative Super Market Ltd. te inchhunkhawma din a ni a; shareholders 323, thawktu nghet 83, muster roll 54 leh contract a thawk mi 33 an awm mek a ni.

Mizoram khaw hrang hrangah petrol pump pariat, LPG distributor paruk leh SKO Designated Point 15 an nei mek a, Mizoram mamawh POL 40% chu MIZOFED lakluh niin, Mizoram pumah LPG consumer 81,520 an nei mek bawk.