Khawpui fai endiktute’n Lunglei tlawh

District khawpui fai inelna endiktu team chuan nimin khan Lunglei khawpui veng hrang hrang an endik a, endiktu team-te hi UDPA deputy director Ralthuama, MPCB scientific assistant Casey Lalnunsangi leh CYMA finance secretary Roneihthangate an ni.

Lunglei district hotute chuan endiktu team-te hi Lunglei Convention Centre conference hall-ah an lo dawnsawng a, Lunglei Town Sanitation Task Force chairman M Misael, additional DC chuan,”Lunglei hi khawpui fai kan lo ni tawh a, kan khawlai dinhmun enin beiseina kan nei sang” a ti.

DUDO Vanthangpuii chuan faina lama hmalak dan leh Lunglei khawpui dinhmun a lem nena entirin a sawifiah.

Lunglei khawpuiah hian kum 2021 chhungin Lunglei Town Sanitation Task Force hmalaknain hnatlang vawi 70 neih a ni a, auto rickhaw stand 14-ah bawlhhlawm bawm 28 dah niin, Faina Hapta 2021 chhungin hotel, sikul, veng fai, damdawiin leh sorkar pisa fai thlanna neih a ni bawk.