Agri. Minister leh NABARD Chairman inkawm

Agriculture minister C Lalrinsanga chuan nimin khan a pisaah National Bank for Agriculture and Rural Development (NABARD) chairman Dr GR Chintala a kawm a, NABARD leh Mizoram sorkar thawhhona hrang hrang an sawi dun.

C Lalrinsanga chuan NABARD-in kawng tam taka Mizoram sorkar a puih tawhna leh puih meknaah, a bik takin RIDF chungah a lawm thu a sawi a; tuna NABARD lama ṭanpuina dil mekte ngaihtuah sak turin a ngen bawk.

NABARD Chairman chuan Agriculture Minister thusawite chu a lo bawhzui tur thu a sawi a, “PACs tihchangtlunna tur PACs as Multi Service Society Scheme, tuna PACs 3-a kalpui mekte chu Mizoram PACs ti ṭha 28-ah kalpui vek theih nise chuan cooperative movement chu Mizoramah a chak sawt ka ring,” a ti.