Hripui vei 320 hmuh belh

December 8, Nilaini khan Mizoramah Covid-19 vei mi 320 hmuh chhuah a ni a, nimin khan tlai dar 5 thlengin hripui vei dam tawh mi 276 chhuahtir an ni. Hripui vei enkawl mek mi 2,773 an awm a, hei hi hripui vei tawh aṭangin 2.01% a ni.

Nilainia Covid-19 vei hmuh tharte chu mipa 161 leh hmeichhia 159 an ni a; ZMC RT-PCR a hmuh 38, TrueNAT hmanga hmuh 43, RAT hmanga hmuh 231 leh FIA hmanga hmuh pariat an ni.

IDSP record angin, Mizoramah Covid-19 vei 1,37,377 hmuh chhuah a ni tawh a, mipa 66,303 leh hmeichhia 71,074 an ni a, mipa aiin hmeichhia 4,771-in an tam zawk. Nimin tlai dar 5 thleng khan mi 1,34,095 (97.61%) chhuahtir an ni tawh a, mi 509 (0.37%) thi tawhin, enkawl mek mi 2,773 (2.01%) an awm.

December 8, Nilainia Covid-19 vei hmuh thar mi 320 zingah symptom nei mi 199 leh symptoms nei lo mi 121 an ni. Nilainia swab sample endikah positivity rate 10% chung lam district paruk a awm a, positivity rate sànna ber Khawzawl district-ah 30.13% a ni. Positivity rate 10% chung lam dangte chu - Serchhip district-ah 29.32%, Lunglei district-ah 21.42%, Champhai district-ah 20%, Mamit district-ah 12.12% leh Hnahthial district-ah 10.76% a ni.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 7, 2021 thlenga swab sample endik tawh 14,56,811 aṭanga RT-PCR hmanga endik zat percentage chu 22.43 a ni a; RAT hmanga endik zat chu 71.66% a tling a, a pung zel thung.

Kum 2011 chhiarpui aṭanga chhûtin, Mizorama Covid-19 vei hmuh tawh 1,37,057 chu mi 1,000 zelah hripui vei mi 125 an awm ang a ni a; mi 1,00,000 zela Covid-19 vangin mi 46 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 276 an chhuak a; Aizawl district-ah 134, Champhai district-ah 40, Serchhip district-ah 29, Hnahthial district-ah 22, Lunglei leh Lawngtlai district-ah 13 ve ve, Saitual district-ah pasarih, Kolasib Khawzawl leh Mamit district-ah paruk ṭheuh an ni.