Covid-19 dona atan HFW Dept-in Cheng nuai 10,970.32 dawng tawh

Health & Family Welfare department chuan, kum hnih chhungin Covid-19 hripui dona atan sorkar laipui, Mizoram sorkar leh hmun dang aṭangin cheng nuai 10,970.32 a hmu tawh a; chu'ng zinga nuai 5,465.87 chu Mizoram sorkar aṭanga a dawn a ni.

Vanglaini-in RTI Act hmanga a zawhna chhànnaa a lan danin, HFW department-in hripui dona atana kum hnih chhunga cheng nuai 10,970.32 a hmuh tawhte chu Directorate of Hospital & Medical Education (DHME), Directorate of Health Services (DHS), National Health Mission (NHM) leh Zoram Medical College (ZMC)-in kum 2020-21 leh 2021-22 chhunga an dawn a ni.

Péng pali zingah hian DHS chuan sum hmu tam berin, cheng nuai 3,775.85 an hmu tawh a, chu'ng zinga nuai 3,566.45 chu Mizoram sorkar aṭangin a ni. DHME-in cheng nuai 2,611.45 a hmu tawh a, chu'ng zinga nuai 1,433.86 chu state sorkar aṭanga hmuh a ni.

NHM-in nuai 3,695.34 an hmu a, a hmuh zingah Mizoram sorkar aṭanga hmuh a awm lo. ZMC-in nuai 887.68 an hmu tawh a, chu'ng zinga nuai 465.56 chu Mizoram sorkar pek a ni.

DHME chuan kum hnih chhungin ṭum 16 sum a dawng tawh a; Mizoram sorkara Finance department aṭangin ṭum kua, Chief Minister's Relief Fund aṭangin ṭum thum, DoNER under NESIDS, Powergrid Corporation of India, State Disaster Response Fund (SDRF) leh Hardonians aṭangin ṭum khat ṭheuh a dawng tawh.

DHS-in ṭum li - Finance department aṭangin ṭum hnih, CMRF leh Disaster Management & Rehabilitation (DMR) aṭangin ṭum khat ve ve a dawng tawh.

ZMC-in ṭum 14 a dawng tawh a; Finance department aṭangin ṭum sarih, DMR department (DHS kaltlangin) aṭangin ṭum khat, DMR department leh Department of Biotechnology aṭangin ṭum hnih ve ve, ICMR leh NHM aṭangin ṭum khat ve ve an dawng tawh. NHM, Mizoramin sorkar laipuia NHM aṭangin ṭum li leh North Eastern Council aṭangin ṭum khat a dawng tawh a ni.