Dr Thangtea'n sorkar laipui a dawr
Commerce & Industries minister Dr R Lalthangliana chuan November 18, 2021-a North-East MSME Conclave, Guwahati-a neih ṭuma MSME minister Narayan Rane thurawn bawhzuiin December 9, Ningani leh nimin khan hripui lengin Mizorama micro enterprises enkawltu harsatna tawk chhungkaw 50,000 khaichhuahna tur 'Proposal for Special Economic Package' chungchangah sorkar laipui hotute a kawm.
Dr R Lalthangliana hian Union Minister for MSME bakah, DoNER minister G Kishan Reddy leh Union Finance secretary Dr TV Somanathan-te chu an pisaah kawm a, Mizorama industry-te dinhmun leh Covid-19 hripui vanga industrial unit-te harsatna tawh hrang hrang a sawipui a ni.
Sorkar laipui aṭanga hripui leng vanga eizawnna tlachhiate chhanchhuahna tur ṭanpuina pek a nih loh chuan industrial unit tam tak chu hnathawk chhunzawm thei loa khar mai hmabak an nih thu Dr Lalthangliana chuan a sawi.
Dr R Lalthangliana chuan sorkar laipuia micro enterprise-te chhanchhuahna tur ‘Proposal for Special Economic Package’ an thehluh tawh chu tihhlawhtlin sak ngei tura ngenin, “Mizorama industrial unit zinga 97.36% chu micro enterprises an ni a, an dinhmun a ṭhat chuan Mizoram economy pawh nasa takin a mumal theih phah dawn. MSME guidelines nen inmil lo deuh pawh nise a pawimawhzia min hriat sak a ṭul a ni,” a ti.
Sorkar laipui hotute chuan proposal chu uluk taka an lo zirchian tur thu leh a hlawhtlin theih nan theihtawp chhuaha hmalakpui an tum thu an lo hrilh niin sorkar thuchhuah in a tarlang. Ayush minister Sarbananda Sonowal hnenah Dr Thangtea chuan Mizoram hmun hrang hranga AYUSH Hospital sakna tur atana DPR an thehluh tawh chungchang a sawipui a; Union Minister hian a lo bawhzui sak tur thu sawiin, AYUSH Hospital dang din belh leh zel a nih theih dan turte an sawi dun nghal.
Dr R Lalthangliana hian NITI Aayog member (Health) Dr VK Paul chu Civil Hospital, Aizawl leh damdawi-in dangte tihchangtlunna tur atana a ngenna a tihhlawhtlin sak ṭhin avangin lawmthu a hrilh. Civil Hospital, Aizawla dah tur magnetic resonance imaging (MRI) mamawhna a thlen chungchangah Dr VK Paul chuan Boeing Company in an tihsak theih dawn thu leh thla ruk chhunga tihfel vek theih an inbeisei thu Dr R Lalthangliana hi a hrilh.
Dr R Lalthangliana hian New Delhi-a Canada High Commission (embassy) pawh tlawhin, Mizorama Covid-19 hripui leng mek dinhmun leh Commerce & Industries sector-a Canada in Mizoram a puih theihna turte an sawiho.