KHAWTHLIR
Iron rod dik lo Man hnem
Sub- Committtee on Quality Control of Cement & Iron Rod chuan a thawhhnih nan December 9, Ningani khan Aizawl khawpuia iron rod dealer-te dawr an endik a; Bureau of India Standard-in iron rod size tura an bituk ang ni lote an man. Legal Metrology Act 2009 hmangin December 2, 2021-a a thawhkhatna an lo neih tawh nen Aizawla dawr 61 aṭangin iron rod kg. 5,29,000 an man tawh.
Minister-in hawng
Minister of state Lalruatkima chuan December 9, Ningani khan Khuangleng khuaa higher secondary school thar a hawng a, bialtu MLA Ramthanmawia'n a ṭawiawm. Khuangleng HSS hi Samagra Shikha Project Approval Board (PAB) in May 29, 2020 khan din a remti a; May 4, 2021 aṭangin official-a sikul kalpui an a ni. Tun dinhmunah zirtirtu paruk leh zirlai 39 an awm mek.
Cake siam intihsiak
Tourism department chuan nimin khan Winter Festival 2021 Cake Baking Competition an buatsaih a, chief secretary Dr Renu Sharma-i'n a hmanpui. Intihsiaknaah hian mi 26 an tel a, pakhatna Sarah Lalremruati, Ramthar Vengin Rs 20,000; pahnihna Gospel Lalfakzuali, Mission Vengthlangin Rs 15,000 leh pathumna Melody Rosangpuii, Upper Republic-in Rs 10,000 an dawng.
Lungphum phum
Sports minister Robert Romawia Royte chuan nimin khan Sihthiang, Chuhvel leh Saikhawthlir khuaah Fitness Centre cum Volleyball Court siamna tur lungphum a phum a; ramria police duty-te a tlawh nghal.
Zu man hnem
Excise & Narcotics department (END) leh Police-te chuan November 2021 chhung khan zu zuar 332 leh zu rui 66 an man. November 2021 chhung khan END leh Police-te chuan zu zuar 332 leh zu rui 66 bakah - rak zu litre 7,668.5; zu bilhlai in 11,828; dawidim kg 37.5; IMFL ml 750 bur 1,429 leh ml 375 bur 533; canned beer ml. 500 bur 1,192; grape wine litre 52; BEDC litre 28; foreign (Imp) liquor bur 10; foreign (imp) canned beer bur 105; zu sakna bel 105 leh lirthei 13 an man a ni.
Minister-in lawmpui
Agriculture minister C Lalrinsanga chuan a bial chhung mi inbuanchak leh weightlifter P Lalchamliana, Lunglei Venglai chu a thawhna department-in Mizoram Police-in ‘Out of Turn Promotion (duhsakna hmanga promote)’ pe a, constable aṭanga havildar-a a kaisan tir avangin nimin khan a pisa-ah lawmpuina a hlan.
MNF-ah lawmlut
Tuikum bialtu MLA Lalrinawma chuan nimin khan Sialhau VC treasurer ni lai F Pazawna (ZPM) chu an party-ah a lawmlut. Lalrinawma chuan MNF chu kum 2023 MLA inthlan lo awm turah beiseina nei eng ber an nih thu a sawi.
Rural Haat hawng
NABARD chairman Dr GR Chintala chuan nimin khan Reiek tlanga NABARD fund hmanga siam Rural Haat building a hawng. Rural Haat hi NABARD aṭanga hmuh cheng nuai 9.975 leh Reiek VC aṭanga hmuh nen a vaiin cheng nuai 10.50 hmanga sak a ni.