Tourism Minister leh MLA-in Sihthiangah Bru kûtpui Hodaigri Festival an hmanpui
Sihṭhiang, Mamit district-ah nimin khan Bru Cultural Organisation chuan 2nd State Level Hodaigri Festival, 2021 an buatsaih a, Tourism minister Robert Romawia Royte leh Zothantluanga, MLA-te'n an hmanpui a, Chief Minister aiawhin festival ṭanpuina atan Rs. 1,00,000 an hlan.
Robert Romawia chuan Hodaigri Festival hmang thei tura Bru Cultural Organisation-te hmalakna chu lawmawm a tih thu sawiin, "Pathianin hnam hrang hrangte min siam a, Kristian ram kan nih angin kan hnam nun zia phochhuahna tura hun kan hmante hi Pathian duhzawnga kan hman a pawimawh," a ti a, Mizoram sorkarin Hodaigri Festival hian Mizorama hnam hrang hrangte karah inunauna ṭha zawk a thlen a duh thu a sawi.
Robert Romawia chuan Mizoten hnam dang pawisawi lo kut an thlak ngai lo tih sawiin, "Rawng takin an la that ve ngai lo. Mahse, Mizo pawisawi lo rawng taka thah hi kan tam tawh lutuk. Hei hi Pu Zoramthanga kaihhruai sorkarin a duh lo tih lo hria ang che u," a ti a, hnamdang Mizorama awm duh chu ṭha takin an awm mai tur a nih thu a sawi.
Man Power Development Board vice chairman Zothantluanga, MLA pawhin thu sawiin,"Kan hnam ziarang chawi nunga, vawng nung rengchunga inngeih tlang taka khua leh tui ṭha ni tura kan khawsak hi thil ṭul ber a ni," a ti .
Hodaigri Festival hi Ningani aṭanga neih ṭan niin, nizan khan a ṭiak. Festival hi kumtluana Bru-te an hnathawhna, tluangtaka an thawkzo thei an lawmzia lantir nana hman ṭhin a ni.