Sample 2,342 endik aṭangin hri vei hmuh chhuah 14.01%

ecember 9, Ningani khan Mizoramah Covid-19 vei mi 328 hmuh chhuah a ni a, heihi Ningania sample endik zawng zawng 2,342 aṭangin 14.01% a ni.

Nimin khan tlai dar 5 thlengin hripui vei dam tawh mi 278 chhuahtir an ni a; hripui vei enkawl mek mi 2,820 an awm a, hei hi hripui vei tawh aṭangin 2.04% a ni.

IDSP record angin, Mizoramah Covid-19 vei 1,37,705 hmuh chhuah a ni tawh a, mipa 66,469 leh hmeichhia 71,236 an ni a, mipa aiin hmeichhia 4,767-in an tam zawk. Nimin tlai dar 5 thleng khan mi 1,34,373 (97.58%) chhuahtir an ni tawh a, mi 512 (0.37%) thi tawhin, enkawl mek mi 2,820 (2.04%) an awm.

Ningania Covid-19 vei hmuh tharte chu mipa 166 leh hmeichhia 162 an ni a; ZMC RT-PCR a hmuh 30, TrueNAT hmanga hmuh 54, RAT hmanga hmuh 243 leh FIA hmanga hmuh pakhat a ni.

December 9, Ningania Covid-19 vei hmuh thar mi 328 zingah symptom nei mi 157 leh symptoms nei lo mi 171 an ni a; Nilainia swab sample endikah positivity rate 10% chung lam district pasarih a awm. Positivity rate sànna ber Khawzawl district-ah 32.12% a ni a, positivity rate 10% chung lam dangte chu - Serchhip district-ah 28.30%, Hnahthial distrect-ah 17.54%, Champhai district-ah 17.12%, Lunglei district-ah 16.69%, Mamit district-ah 10.74% leh Aizawl district-ah 10.57% a ni. Kolasib district-ah sample endik a awm lo.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 7, 2021 thlenga swab sample endik tawh 14,59,153 aṭanga RT-PCR hmanga endik zat percentage chu 22.40 a ni a; RAT hmanga endik zat chu 71.69% a tling a, a pung zel thung.

Kum 2011 chhiarpui aṭanga chhûtin, Mizorama Covid-19 vei hmuh tawh 1,37,705 chu mi 1,000 zelah hripui vei mi 125 an awm ang a ni a; mi 1,00,000 zela Covid-19 vangin mi 46 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 278 an chhuak a; Aizawl district-ah 115, Champhai district-ah 35, Saitual district-ah 29, Serchhip district-ah 26, Lunglei district-ah 21, Mamit district-ah 20, Lawngtlai leh Khawzawl district-ah 10 ve ve, Kolasib district-ah pariat leh Siaha district-ah pali an ni.