Mizoram UPC Assembly ṭiak

December 9 aṭanga Assembly Centre, Zonuama Mizoram UPC rorelna sang ber General Assembly neih ṭan chu nimin khan a ṭiak a, kum 2022 budget atan cheng vaibelchhe 24.71 chu an pawm.

Nimin rorel in­khawm­ah hian general superintendent Rev. C. Lalremsanga chuan pastor pasarih nemnghehna (ordination service) a neih hnuah tual upa, upa, sr. upa leh pastor, inkhawmpui leh inkhawmpui inkara thi mi 46 te sunna hun serh hman a ni a, general treasurer Rev. PB Lalhmuliana chuan sunna hunserh hi a hmang a ni.

Rorel inkhawmah hian hripui leng dinhmun a ziaawm ve leh revival team dina, rawngbawlna hma lak chhunzawm turin an rel a, biak-in inkhawmah Bible keng uar tura inzirtirna neih ni se, an ti bawk. Bawngkawn bial chu kum 2023-ah bial hnih leh Zemabawk bial chu kum 2025-ah bial hniha ṭhen tura tih a ni.

Mizoram UPC Assembly Report bua a lan danin Mizoram UPC member zat chu 70,907 niin pastor bial 77 leh pastor 99 an awm a ni.