Pathianin MNF-te min awmpui tlat - K Lalrinliana

MNF chuan nimin khan Hnam Runah chhung inkhawm an buatsaih a, thusawitu MNF adviser K Lalrinliana chuan MNF-te chu Pathianin a awmpui tlat niin a sawi.

K Lalrinliana chuan MNF chu a dintirh aṭangin Pathianin a hruai thu sawiin, “Thuneihna chan lai leh dinhmun hniam zawka kan awm lai pawhin, min thlahthlam hauh lo. Kum 60 zet min hruai thlengin Diamond Jubilee lawm thei hialin min chawisang a ni. Hun harsa tak tak kan lo hmachhawn tawh ṭhin a, min awmpuitu hian min awmpui reng a, min chawisan lai leh dahhniam lai pawhin min thlahthlam lo,” a ti.

Kum 2018 inthlanpui dawn ah hripui len tur thu leh ramriah buaina namen lo a awm tur thu tumahin an la hre lo tih sawiin MNF Adviser chuan, “Chief Minister, remhria leh a ngaihna hriain min hruai a, khawvel sorkar ropui tak tak manganna leh buaina karah an chawl ṭhuap a, India ngei pawh a bang lo,” a ti a, Mizoram chu state pachhe tak nimah se, Treasury khar ngai loin tun thlenga a la awm thu a sawi.