Kangmei ven dan tur sawiho

State Level Sub Committee on Fire Prevention Committee chu nimin khan an chairman, Environment Forest & Climate Change (EFCC) minister TJ Lalnuntluanga hoin Secretariat conference hall-ah an ṭhu a, kum 2021 kum tira Mizoramin kangmei a tawrh nasat dan leh a nghawngte an thlirho.

TJ Lalnuntluanga chuan ,”Nikuma harsatna kan tawhte thlirletin, kumthar lo awm tur atana ruahmanna hma taka kalpui a ni hi a ṭha hle. Kan harsatna tawhte hre rengin kum 2022 ṭhal hmachhawn tura inpuahchahna ṭha tak neih a ṭul,” a ti.

Committee chuan kum 2022-ah February 7-12 inkarah Fire Prevention Week hman ni se a ti a, thupui (theme) atan ‘Kangmei chhuak tur ven mi tin mawhphurhna’ tih an thlang.

Lo hal hun ni hnu­hnung ber atan March 15, 2022 chu ruat a ni a, hemi hnu lama lo hal emaw bawhchhia emaw chu dan hmanga hrem an nih theih nan district thuneitute’n ruahmanna siam se, an ti.