CM Hawla'n Delhi Dialogue-ah a tel Mizoramin a mamawhte a sawi lang

Asia chhimchhak ram sawm inthlun­zawmna, Association of South East Asian Nations (ASEAN)-te leh India aiawhte kum tin an intawhkhawmna, Delhi Dialogue chu July 19-20, 2018 chhung khan Oberoi Hotel, New Delhi-ah buatsaih a ni a; chief minister Lal Thanhawla pawh telin, Mizoram leh India hmarchhak state-te'n hmasawnna chak zawk an neih theihna tura ṭul leh mamawhte a sawi lang.

Chief Minister chuan, Act East Policy-in ASEAN ramte nena inkungkaihna a siam dawn a, hmarchhak state-te sum leh pai leh ei leh bàr dinhmun nasa taka a vawrh theih thu a sawi a, "Hei hian leilung hausaknate awmze neiin a hman ṭangkaitir thei. Chumi atan chuan ASEAN ramte nen tui leh khawmuala inkalpawhna ṭha tak neih a ṭul. Kumina Delhi Dialogue thupui 'Strengthening India - ASEAN Maritime Cooperation' nen pawh a inhmeh hle a ni," a ti.

Lal Thanhawla chuan, Ministry of External Affairs hmalaknaa Act East Policy hnuaia Kaladan Multi Modal Transit Transport Project siam hna chu thawh mek zel a nih thu sawiin, "Mizoram sorkar chuan a thawh ve tur chinah 76% zawh a ni tawh," a ti a; lei dawh tur pariat zinga pali chu ṭhál a lo thlen a thawk nghal thuai turin ruahmanna siam a nih thu a sawi.

India leh Myanmar inrìna Zokhawthara Land Customs Station chu a enkawltute thuam ṭhat kawngah sorkar laipuiin chak zawka hma a lak a ngaih thu sawiin CM Hawla chuan, "Helai hmun panna kawng zauh leh siamṭhat hna hi World Bank-in an thawk mek a ni. Bangladesh nena Mizoram inrina lamah chuan Kawrpuichhuah Integrated Check Post (ICP) hawn a la ni lo a, Land Port Authority of India chu chak zawka hma la tura a beisei an ni," a ti.

Delhi Dialogue special plenary session kaihruaitu Minister of state for External Affairs, Gen. VK Singh chuan, kumina thupui chuan India leh ASEAN ramte thawhhona chak zawk a thlen ngei a beisei thu sawiin, "India sorkarin hmarchhak state-te a ngaihpawimawh hle. Act East Policy hi Look East Policy aṭanga hmasawnna satliah mai a ni lo a, huam zau zawkin, rah ṭha hmu ngei tura ngawrh zawka hna thawh a ni," a ti a; Act East Policy hlawhtlinna atan hmarchhak state-te'n sorkar laipui an thawh­pui ṭhat a ṭul thu a sawi.

Delhi Dialogue Special plenary session zawh hian External Affairs Minister Sushma Swaraj hoin ministerial session neih chhunzawm a ni.