Serchhip ODF certificate hlan

Serchhip district chu páwn lama inthiar awm lohna, open defecation free (ODF)-ah puan a ni a, PHE department chuan Serchhip DC Sangchhin Chinzah hnenah nimin khan ODF certificate an hlan. Certificate inhlannaah hian Swachh Bharat Mission (Gramin) hnuaia Serchhip district-a hmalakna leh hmachhawpte an sawiho nghal.

Inkhawm kaihruaitu Serchhip bawrhsap leh SBM(G) chairman Sang­chhin Chinzah chuan, Serchhip district-in faina kawnga hma a sawnnaah sorkar aṭanga thawktu te, khawtlang hruaitute leh tlawmngai pawlte hma­lakna avangin lawmthu a sawi a; faina kawnga nasa lehzuala hma la chhun­zawm zel turin a sáwm.

SBM(G) district coor­dinator Samuel Lallawm­zuala'n report a pek danin, Serchhip district-ah hian SBM(G) hnuaiah khua 35 a awm a, chu'ng khuaa ek-in ṭha nei lo chhungkaw 422 chu ek-in (sanitary complex) siamsak an ni.