Engtik kawng pawhin ṭha takin Kawng siam tur a ni - CYMA

Central YMA chuan nimin khan Mizoram sorkar hnuaia kawng siamtu company/contractor-te an ko khawm a; CYMA president Vanlalruata chuan, 'Engti kawng pawhin Mizoram kawngte ṭha taka siam tur a ni' tih chu CYMA ngaihdan a nih thu a sawi.

CYMA President chuan, YMA General Conference hnu­hnung berah Mizorama kawngte ṭha taka siam a nih theihna atana hmalak an rel thu sawiin, "Chumi bawhzuina kal zelah PWD-te nen inremna kan ziak a ni. Inremna chungchang hi YMA hruaitute hrilhhriat an ni tawh. Vawiina inkoh khawm pawh hi inkhawmpuia kan thurel bawhzuina kal zel a ni," a ti.

Harsatna awmte engtin nge kan hmachhawnho ang tih ngaihtuah tura inko khawm an nih thu sawiin Vanlalruata chuan, "Contractor-tea chinfel theih te, YMA lam mawhphurhna turte a awm thei. Engvang mahin kawng quality hi a chhe tur a ni lo," a ti a; harsatna a awm a nih chuan a chingfel tura ṭanho a pawimawh thu a sawi.

Vanlalruata chuan, kawng siamnaah ruahsur chhuanlam tur a nih loh thu sawiin, "Mizoram hi ruahtui tlak tamna hmun a ni tih kan hre vek a, a tlâk duh hunte pawh hriat sa vek a ni. Ruahtui tlak dan chhût a, chu mi mila hna thawk turin ruahmanna siam mai tur a ni," a ti.

PWD engineer-in-chief R Vanlal­tluanga chuan, PWD-in duh dan a nei a, chumi tihlawh­tling tur chuan a hmanruaah contractor-te an awm thu sawiin, "PWD leh CYMA-in inremna kan ziah chhan pawh hi PWD-in an hna an tlin tâk loh vang ni loin, mipuiin neitu rilru púa kawng an enkawl theihna atan a ni," a ti a; thawhhonain kawng ṭha a thlen tur thu a sawi.

R Vanlaltluanga chuan, con­tractor-te'n Mizoram hmasawn­na atan hna an thawk a ni tih an hriat nawn a pawimawh thu sawiin, "Engineer lam pawh contractor rawih an nih tawh avangin kut sil nghal mai tur a ni lo. Contractor har­satna hi kan harsatna a ni tih kan hriat a pawimawh. Harsatna a awmin, inhrilh zung zung a, ching­fel tura hmalak a pawimawh," a ti.

Inràwnkhawmnaah hian Mi­zo­rama kawng siam hna thawk ṭhin contractor/company aiawh eng emaw zat an kal a, harsatna an neihte an sawi lang. CYMA hruaitute leh PWD hotute nen kawng ṭha zawka siam a nih theih dan tur te, harsatna awm chinfel dan tur an sawiho a ni.