Ruihhlo vangin Myanmar sipaite'n Khawmawiah Mizo pali an man

Tun hnaia Central YMA leh UCYN (Myanmar NGO) ten ruihhlo do tura thawhhona thu­thlung (MoU) an siam kal zelah Myanmar sipaite chuan Mizoram mi pali ruihhlo vangin an man tawh.

Thu dawn danin, Central YMA hruaitute chuan Myanmar aṭanga Mizorama heroin lut tam lutuk tihziaawm theihna a nih beiseiin June 27, 2018 khan CYMA president Vanlalruata hoin Khawmawi, Myanmar-ah an kal a, an V/C-te leh Rih-Lentlang Youth Association (RLYA)-te puihnain ruihhlo tawlh ṭhinte an ko khawm a ni.

CYMA chuan ruihhlo tawlh ṭhinte chu ruihhlo vanga Mizoramin a tawrh nasatziate hrilhin, ruihhlo tawlh tawh lo turin an ngen a; Khawmawi khawtlang hruaitute hmalaknain ruihhloa sumdawng tawh lo tura inngen nan khaw pum huap meeting koh a ni bawk.

Khawmawi lam chuan Mi­zorama ruihhlo tawlh luh a nih tawh lohna atan hma an la a, ruihhlo tawlh ṭhinte chuan 'Tu nge awm rei thei zawk' tih changchawiin ruihhlo an tawlh ṭha duh tawh lo. Ruihhlo a vàn tâk avangin Mizoram mi eng emaw zat chu Khawmawiah kalin, heroin an han la a, chu'ng mite chu Myanmar sipaite chuan an lo man ṭhin.

Myanmar sipaite chuan July 14, 2018 khan Aizawla awm inti mipa pakhat chu heroin hawng khat nen an man a, July 15-ah Chhinga Veng cheng inti mipa pakhat leh hmeichhe pakhat chu heroin hawng khat ve ve nen an man leh bakah, zanah Zokhawthar mi inti mi pakhat chu heroin hawng khat nen an man leh bawk. An vai hian Khaw­mawi-ah man an ni.

Heroin vanga man mi palite hi Falam, Chin state, Myanmar lamah an chungthu rêl tura hruai an ni a, Foreigner Act tel miah lo pawhin heroin vang ringawtin kum 20 chhung Myanmar jail-a táng tura hrem theih an nia thu dawn a ni.