Duhthlanna kan tilang tur a ni - PL Liandinga

Ṭangrual pawl, Zoram Peoples' Movement (ZPM) thupuangtu (spokeman) PL Liandinga chuan, kumina Assembly inthlanpui awm turah mi ṭha leh dik nia an hriatte chu vote turin mipui a chah a, "Kan duhthlanna kan tilang ngei tur a ni," a ti.

PL Liandinga hian nimina ZPM pisaa inkhawmah thu sawiin, kumina Assembly inthlanpuiah mi ṭhenkhat chuan an vote an hralh leh ngei a rinawm thu a sawi a, "Hetianga vote hralhtute hi mi lem an ni a, khaw khata mi pangngai an ni ngai lo. Mi ṭha leh dik nia kan hriat chu huaisen takin kan vote mai tur a ni a, kan duhthlanna kan tilang ngei tur a ni," a ti a; inthlannaah hian ZPM-in sorkarna an chang a nih pawhin, an thinlung a danglam tur a ni lo a, mipui sorkar din tur an nihna an lantir tur a nih thu a sawi.

ZPM policy pakhat - Village Development Committee (VDC) siam chu thingtlang mite khaichhuahna atana pawimawh a nih thu sawiin Liandinga chuan, "Mipui sorkar nihna tak pawh a ni," a ti. Sorkar mekte’n NLUP an sawi uar em em laiin, a hlawhtlinpui tawhtu an sawi thei lo nia sawiin, "Lemchangin NLUP hi an kalpui a ni. Hetianga ram hruaitute'n mipui min enkawl avang hian ramin a chhiat phah a, mipui thinlung a tikhawlo zo a ni," a ti.

PL Liandinga chuan, hmun tinah mipui an phun sup sup a, sorkar thlak duhna a lian hle tih sawiin, "MNF party-in kum 10 an sorkar chhung khan sûlhnu ṭhahnem tak min hnutchhiah a, hna ṭha tak tak an thawh laiin vawiin thlenga kan la sawi bân theih loh sûlhnu ṭha lo tak tak pawh min hnutchhiah bawk," a ti a; MNF-in sorkarna chang leh pawh ni se, an mizia an thlak a rinawm loh thu leh, MNF sorkar laia police mawza man to leh toilet van-te phei chu ṭhangtharte'n an la chhui chian duh a rin thu a sawi.

ZPM chuan ram hmangaihna leh Zoram hmun hrang hranga chhanchhuah ngaite chhanchhuak turin sorkarna siam tuma hma an lak mek thu sawiin, "Hlawhtlinna kan chang lo a nih chuan keimahni thiam loh vang a ni ang. Hmun hrang hrang aṭangin min au reng a, ni tin Steering Committee a ding reng bawk. Mipui beidawng tawhte'n keimahniah beiseina nei tharin min nghak ṭhup a, sorkarna siam thei tura ke kan pên a ngai a ni," a ti.

ZPM inkhawma hunserh hmangtu Rev. Lalremtluanga chuan, Mizoram chhan chhuak turin ZPM a ding tak avangin Mizoramah rorelna dik a awm ngei a beiseiawm tih sawiin, "Pathianin mipui bawhchhiatna chu a ngaidam mai thei a, ram hruaitute bawhchhiatna erawh chu a ngaizam ve lo a, ramin a tawrh phah ṭhin. Kan ramah hian ram roreltu ṭha leh dik kan mamawh a ni," a ti a; rinawmna nena ram hruaina hna thawk turin mipuiin ZPM an beisei thu a sawi.