KHAWTHLIR
Tui luh zir
Tuitla an awma awlsam zawk leh remchang zawk a awm theih nan Kolasib District Disaster Management Authority (KDDMA) leh YMA Sub-Headquarters, Kolasib ṭangkawp chuan nimin khan District Park, Thingdawlah tui chhunga luh zirna, Scuba Diving Training an buatsaih a, Kolaib DC Dr Arun T-in a hmanpui.
Hmalakna thlirho
District hnufual leh chawikân ngai Aspirational District-a Mamit district thlan a nih chungchangah nimin khan Mamit DC conference hall-ah Health secretary Lalrinliana Fanai leh Social Welfare secretary K Vanlalrawni te hoin district thuneitute an ṭhukhawm. Meeting-ah hian Mamit district-a Health department leh Social Welfare department hmalakna hrang hrangte an thlirho a ni.
GST zirtir
Nimin khan Taxation conference hall, Lungleiah Administrative Training Institute (ATI) leh Taxation department buatsaihin Lunglei, Lawngtlai leh Siaha district-a Taxation officer-te tan Refresher Course on GST Portal buatsaih a ni a; Lunglei additional DC Benjamin Lalzama'n a hmanpui.
Minister-in enfiah
Commerce & Industries minister H Rohluna chuan Ningani khan Aizawl New Market chhunga NEC aṭanga sum hmuh cheng vbc. 13 sênga sak mek New Market Building Phase-I leh NEDP kaltlanga cheng vbc. 36.519 sênga sak tur Aizawl City Centre Annexe-I te, Zuangtui Industrial Estate hmunhma thawm ṭhat hna Ministry of Commerce & Industries aṭanga sum hmuh cheng vbc. 18.25 sênga thawh mekte a tlawh a, hna thawh dan a enfiah.
ZPM lawm
Zoram Peoples' Movement (ZPM) chuan thuchhuah siamin, pawl thar Operation Mizoram leh Wake Up Mizoram a ding chu lawmawm an tih thu leh, ram vei tak tak an pên chhuak zel chuan huan rah duhawm tak a chhuah ngei an beisei thu an tarlangin, Operation Mizoram leh Wake Up Mizoram hmalaknate theihtawpa thláwp turin mipui an ngen.