Naupang khuaikhem a bo theih nana Beihpui thlakna tur Lawngtlaiah hawng

World Vision India leh Lawngtlai District Child Protection Unit (DCPU) chuan nimin khan Central YLA Hall, Lawngtlaiah naupang khuaikhem (child sexual abuse) a bo theihna atana beihpui thlak tur hawnna an buatsaih a, minister of state C Ngunlianchunga'n a hmanpui.

C Ngunlianchunga chuan, changkanna kawngah a ṭha zawnga hma sawnna a awm rualin, sual pawh a pung ve zel a, thil thleng thei pawha mawi lo, naupang khuaikhem thlengin Mizoramah pawh a hluar zel tih a sawi a, "Heng hi a reh theihna atan theihtawp chhuaha hma latute an fakawm hle. Theihtawp an chhuah mek lai hian, an kuta dah ringawt loin, kohhran leh khawtlangin ṭangruala beih ve a ngai," a ti.

World Vision India hian India rama hur sualna kawnga naupang khuaikhem tibo turin beihpui a thlak mek a, kum 2021 ral hmaa ram pum tuam chhuah hman an tum. Naupang kum 18 hnuai lam nuai 100-te himna turin India ram district 200 huam chhunga khawpui leh thingtlang khaw 7,000-ah campaign neih an tum a, Mizoram tiamin state 15-ah campaign an nei tawh.

State Level Consultation and Launching programme chu July 11-12, 2018 khan Aizawlah neih a ni a, chumi bawhzuina kal zelah district level campaign pawh buatsaih a ni.