Ni 10 hnua result dawn loh vangin Lungleia khung hran mekte'n chaw nghei
Lunglei Ramthar Veng BCM biak-in hmun - community quarantine facility (CQF)-a awmte chuan an swab sample test result a chhuah theih loh avanga lungawi loin nimin aṭang khan chaw an nghei. Mara Students’ Organisation (MSO), Siaha pawhin, Siaha district-a quarantine facility-a awm zinga mi eng emaw zat chu khung hran hun a zawh hnuah pawh test result a la chhuak lo nia sawiin, result hriat thuai an duh thu an tarlang.
Lunglei aṭanga thu dawn danin, BCM Lunglei Ramthar biak-ina khung hran (quarantine) mekte hi hmeichhe pakua an ni a; Delhi aṭanga haw mi paruk leh Haryana aṭanga haw mi pathum an ni. An zinga mi Covid-19 vei hmuh chhuah a nih hnua an swab sample an lak result chu ni 10 hnuah pawh an la dawn loh avangin nimin zing khan lungawi lohna lantirin chaw an nghei a ni.
Lunglei Ramthar biak-in CQF-a khung hrante hi a tirah chuan hmeichhia 10 an ni a, June 1, 2020-ah dah luh an ni. An zinga pakhat chu June 4-ah a swab sample lak niin, Covid-19 hripui a vei tih hmuh chhuah a ni a, Covid Care Centre (CCC), Pukpuiah enkawl zui a ni. Hripui veiin CQF-a a awmpuite chu June 6-ah swab sample laksak an ni a, nimin thleng khan an result an la hre lo.
Lunglei Ramthar CQF-a awmte hi Covid-19 vei ta nen ni li chhung an khawsaho hman a; ni tin an test result an ngaichâng reng a, result a chhuah har avangin zana muthilh ṭhat theih loh phahte pawh an awm niin an sawi. An awmnaah an taksa tihchakna tur hranpa an nei lo a, tuiluma hrawk ṭhuahna tur pawh an neih loh avangin an swab test result chu a rang thei ang bera hriat an phûtin, chaw an nghei ta a ni.
Hmeichhe pakuate chuan, sorkar aṭanga official-a thu lawmawm an dawn hma chuan chaw nghei chhunzawm zel an tum a; an chêt dan chu sorkar tihmualpho an tum vang ni loin, an harsatna sukiang tura an tih theih awmchhun nia an hriat vang a nih thu an sawi.
Hetih lai hian, chaw ngheite hi nimin khan Health department hotute'n an awmnaah kal chilhin, thil awm dan leh swab sample endik chungchangte an sawipuiin an hnem a ni.
Hetih lai hian, MSO thuchhuah chuan, Siaha district-a khung hran mekte chu an awm ṭan aṭanga chawlhkar hnih hnuah pawh test zawng zawng hmun thuma ṭhena hmun khat result pawh a la chhuak tling lo niin a tarlang a, "A chhan ber chu khawl indaih loh vang a ni. District ṭhenkhatah pawh June 4-a quarantine tawh, tun thlenga swab sample la lak lohte pawh an awm ve a ni," a ti.
MSO tarlan danin, quarantine centre-a awmte sample lak zung zung a ni ngai lo a, sample lak hnuah pawh result hre turin kar khat chuang nghah a ngai ṭhin. Result a chhuak a, ṭhenkhatin hripui an vei avangin an chenpuite zawng zawng test ṭhat vat ngai vek an ni. Khawl indaih loh vanga harsatna pumpelh tur chuan an district ṭheuhah RT-PCR khawl bun ve mai a ṭulah an ngai a, tun aṭanga hmalak ṭan a ngai tak zetah an ngai a ni.
Siaha district-a Covid-19 vei hmuh tawhte awmna quarantine centre-a awm ve mi dangte chu press release an siam lai thlengin an swab sample lak nawn a la ni lo a; a rang lama sample la nawn a, endik ṭha leh vat turin thuneitute an ngen.
Laboratory facility leh trained technician awm loh vangin RT-PCR khawl bun a harsat rih tur thu an hria tih sawiin MSO chuan, "A dikna chen pawh a awm. Amaherawhchu, hetiangte neih kim vek hnuaa khawl lei kan tum chauh chuan kum eng zat chiah nge kan nghah leh ngai ang tih hriat a ni lo. Chuvangin, RT-PCR lei tura hmalak a fuh berin a lang," an ti.
MSO chuan, an press release chu Covid-19 dona leh invenna atana mutmú pawh tuah
ṭha hman loa hma latu - medical staff, level hrang hranga task force, tlawmngai pawl, kohhran leh quarantine centre hrang hranga mawhphurtute hmalakna leh hnathawh sawichhiat an duh vang a ni lo niin an tarlang.