Covid-19 chungchang mipui zirtir nan DHS leh NHM-in nuai 29.7 séng tawh

Mizoramin Covid-19 a donaah TV, chanchinbu leh pamphlet/booklet, etc hmanga mipui zirtirna atan Directorate of Health Services (DHS) leh National Health Mission (NHM) chuan Rs 29,07,302 an hmang tawh a; chutih laiin, pamphlet/booklet chhut zat zawhna chhàn a ni lo.

Vanglaini-in RTI Act hmangin Health department-ah Covid-19 chungchanga pamphlet/booklet, TV leh chanchinbu hmanga mipui zirtirna tihchhuah tawh dan leh sum sen zatte a zawt a ni. DHS SPIO leh NHM SPIO-in an chhan danin, kum hnih chhunga DHS senso hrang hrang tarlan belh khawm chu Rs 24,49,662 niin, NHM senso chu Rs 4,57,640 a ni a, a vaiin Rs 29,07,302 a ni.

Kum 2020 aṭanga sum sênna tlangpui chu quarantine facility/centre-a awmte hriat tur, Covid-19 laka invenna atana tih tur leh tih loh tur siam nan Rs 2,00,020 hman a ni a, June 4, 2020 khan Printing & Stationery department-ah chhuttir a ni. Hetiang chiah hian June 8, 2020-ah Aizawla mimal press-ah Rs 3,92,560 séngin chhuttir a ni bawk.

IPR department kaltlangin chanchinbua chhuah tur display advertisement Rs 120,000 man June 26, 2020-ah pek a ni. Chanchinbu panga hnenah Covid-19 laka invenna chungchang inzirtirna tihchhuahna atan Rs 1,43,982 sèn a ni bawk a; mahse, Aizawla chanchinbu liante hnenah pek a ni lo thung.

TV spot, short play drama leh group discussion siamna atan Adam's Family Motion Picture, Durtlang, Aizawl hnenah 18/6/2020 khan Rs 4,30,000 a pek a ni a; TV channel pathum - Doordarshan Kendra, LPS Vision leh ZONET Cable TV-ah TV spot, group discussion leh short film/clip atan 5,52,600 sèn a nih bakah, KL Offset printing press pakhat hnenah Rs 3,00,000 sengin Printing of Covid 19 Diary chhuttir a ni bawk.

Lunglei, Siaha, Lawngtlai, Mamit, Serchhip, Kolasib, Champhai, Tlabung leh Chawngtea chief medical officer (CMO) leh damdawi lam hotu mi pakua hnenah Rs 20,000 ṭheuh pek a ni a; hei hi TV spot, short play drama leh group discussion atan niin, a vaiin Rs 1,80,000 a ni. CMO pasarih - Lunglei, Siaha, Lawngtlai, Mamit, Serchhip, Kolasib leh Champhai tan TV Spot, short play drama leh group discussion atan Rs 1,30,000 pek chhuah a ni bawk.

District hrang hrang tana sum senso pek aṭang hian signboard siam a nih bakah, flex print 150 siam a ni a; Covid-19 donaa tih tur leh tih loh tur bakah, mipui hriat tur thil chi hrang hrang siam a ni.

NHM bikah SPIO-in a chhan danin, chanchinbu leh TV-ah Covid-19 chungchanga mipui hriat tur pawimawhte zirtirna atan Rs 4,57,640 an hmang a; sum pek chhuah hun leh senna TV leh chanchinbu erawh tarlan a ni lo.

Kum 2020-a pamphlet/booklet atana sum sen zat leh thehdarh a nih dan te, a chhutu press hmingte zawhna chu chhan a ni lo a; sum sèn zat tarlan a nih loh bakah, pamphlet thehdarh dan tarlan a ni lo. Hetih lai hian, kum 2020 khan pamphlet siamna atan Rs. 10,53,000 sen a nih thu tarlan a lo ni tawh a ni.