Nau piang an pun zel theih nan Synod-in sorkarah bawhzui a rêl

Mizoram Presbyterian Kohhrana inkhawmpui lian ber, Synod Inkhawmpui 2021 chuan Mizoramah nau piang an pun zel theih nan Mizoram sorkarah hmalak an rêl. Inkhawmpuiah hian nimin chawhma inkhawmah probationary pastor ni lai 17 chu pastor atan nemngheh an ni a, tlaiah inkhawmpui a ṭiak.

Nimin chawhmaa nemngheh inkhawm chu moderator Rev. Dr Vanlalnghaka Ralte-in a kaihruai a, pastor tharte nemnghetin, pro. pastor atana lak tharte a dahnghet. Pastor nemngheh tharte chu Synod Pastoral hnuaia thawk tur mi 10, Synod Mission Board hnuaia thawk tur mi pathum, Manipur area-a thawk tur mi pathum leh field worker pastor tur mi pakhat an ni.

Pro. pastor atana dahnghehte chu Synod Pastoral hnuaia thawk tur mi 10, Synod Mission Board hnuaia thawk tur pahnih, Manipur area-a thawk tur pathum leh field worker pastor tur mi pahnih an ni.

Synod Inkhawmpuiah hian 'Nau piang kan lo pun zel theih nan Mizoram sorkarin a hnuaia thawkte maternity leave ṭum hnih aia tam a pek theih nan Synod-in hma la rawh se,' tiin an rel a; Synod Executive Committee (SEC) bawhzui turin an dah.

General agenda zinga mi, kohhran mipuiin Act East Policy an dawnsawn thiam theih nana hmalak rawtna chu an pawm a, SEC bawhzui turin an dah. State ramri buai chungchangah sorkar tha tichak tura Synod anga hmalak rawtna erawh pawm a ni lo.

Kohhran inkhawm leh inkhawm dangte tihtlem rawtna chu Synod Executive Committee (SEC) zir chian turin an dah a, SEC-in a zir chianna chu Synod Inkhawmpuiah ngaihtuah leh a ni ang. Inkhawm dan kalhmang zir chian rawtna pawh pawmin, SEC zir chian turin an dah.

Mizoramah zirnain hma a sâwn theih nan sorkar leh Synod thawhho dan zawn ni rawh se, tih chu an pawm a, SEC bawhzui turah dahin, Synod Inkhawmpuiah ngaihtuah leh turin an dah. Elementary education syllabus-ah Moral Education subject telh a nih theih nan hmalak an rel a, SEC bawhzui turin an dah a ni.

Pathianni hlutna leh pawimawhna inzirtir thar an rêl a, Synod hminga thuchhuah siam a, tualchhung kohhranah uar lehzuala inzirtir an rel a ni. Pastor pension tawhte politics-a inhman dan tur kaihhruaina siam tura kum 2019 Synod-in a rèl tawha SEC-in ruahmanna a siam chu ngaihtuah a ni a, SEC-in a en ṭhat leh turah dahin, Synod lehah ngaihtuah leh a ni ang.

Synod 2022 puipa turte
Moderator - Rev. Dr C Chawnghmingliana
Secretary - Rev. ZD Lalhmachhuana (Sr.)
- Upa B Lalhmunliana (Jr.)
Finance Officer - Rev. VL Luaia Hranleh
- Rev. PC Pachhunga
Statistician - Rev. Lalsangbera
Executive Secy - Rev. C Zorammawia (Sr.)
- Rev. Dr K Lallawmzuala