ASF vanga vawk thi tlahniam

Vawk pùl hri, African Swine Fever (ASF) avangin nimin thleng khan Mizoramah vawk 29,814 a thi tawh a, tun December thla bikah vawk 15 thi tawhin, ASF vanga vawk thi zat a tlahniam tial tial.

Nimin thleng khan infected area-ah vawk 29,814 leh rinhlelhna khua/vengah vawk 533 a thi tawh a; infected area-ah vawk 10,190 leh rinhlelh khua/vengah vawk 190, a vaiin vawk 10,380 suat a ni tawh.

October 1-12, 2021 chhung khan Mizoramah ASF vangin vawk 420 a thi a, November thlaah vawk 65 leh December thla kal mekah ni 12 chhungin vawk 15 a thi thung.

April 15, 2020-a sorkar laipuiin Mizoramah ASF hri a léng tih a puan hnuah district 11-ah ASF lènna (infected area) khua/veng 272 a awm tawh a, rinhlelh khua/veng dang 96 a awm bawk.

ASF léng nia rinhlelhna khua/vengte chu Khawzawl district-ah 18, Siaha district-ah 17, Lunglei district-ah 13, Mamit district-ah pakua, Aizawl, Kolasib leh Serchhip district-ah pasarih ṭheuh, Hnahthial district-ah paruk, Champhai leh Lawngtlai district-ah panga ve ve leh Saitual distirict-ah pahnih a ni.

ASF vanga vawk suat neitute zangnadawmna pek tur chungchangah sorkar laipui thu ngaihchan a ni a, chuvang chuan hun eng emaw chen chu vawk suat tihtawp a ni tawh. AH&Vety department chuan, chhan hriat loha vawk leh sanghal thi a awm chuan phone number 8731975444 leh 8974027269-ah hriattir zel turin mipui an ngen a ni.