Chief Secretary-in Hnahthial a tlawh

Chief secretary Dr Renu Sharma chuan December 11, Inrinni khan Hnahthial a tlawh a, Hnahthial district bawrhsap R Lalremsanga hoin KVK Training Hall-ah sorkar hotu te, Hnahthial District VC Association, tlawmngai pawlte leh MJA hruaitute nen an inkâwm.

Dr Renu Sharma chuan, chief secretary a nih hmain Mizoramah a awm tawh thu sawiin, tun hnai aṭanga a awm leh hnuah Mizoramah hmasawnna nasa tak thleng a hmuh thu a sawi a; harsatna an neihte chu bawrhsap pisa kaltlangin a hnena thlen ṭhin tur leh tih theih a neihna zâwnah chuan theihtawp chhuahpui a inhuam thu a sawi.

Covid-19 léng avangin duh angin hmasawnna a kal chak thei lo tih sawiin Renu Sharma chuan, "Covid-19 vaccine pek kawngah Hnahthial district hi a ti ṭha pawl tak in ni a, district mipui 100%-in kumin chhung ngeia vaccine an lak theih nan ṭan la ang che u," a ti a; sorkar officer, khawtlang, kohhran leh NGO hruaitute chuan vaccine lak chungchangah mawhphurhna an neih thu a sawi bawk.

Chief Secretary hian KVK, Horticulture, Sericulture leh Agricul-ture department-in thil/thlai thar an pho chhuahte a tlawh a; School of Agriculture Science building sak mek te, District Hospital leh DC pisate a tlawh bawk.