KHAWTHLIR

Pastor nemnghet
Seventh-day Adventist, Mizo Conference hnuaia thawktu pangate chu December 11, Inrinni khan Seventh-day Tlang biak-inah pastor atan nemngheh an ni. Nemngheh inkhawm hi Upa Lalnilawma Colney-in a kaihruai a; nemngheh tharte hnenah pastor Rodingliana, ministerial secretary, North East India Union-in mawhphurhna a hlân a ni.

Thisen pe
KṬP, Ṭhuampui Pastor Bial chuan December 11, Inrinni khan thisen pek an huaihawt a, Synod Hospital tan thisen unit 37 an pe a, petute mipa 30 leh hmeichhia pasarih an ni. Inrinni vêk khan Siahaa kohhran hrang hrang ṭhalaite'n Krismas pualin thisen unit 30 an pe e, petute mipa 22 leh hmeichhia pariat an ni.

MLA-in tlawh
Aizawl South-III bialtu MLA Prof. F Lalnunmawia chuan December 11, Inrinni khan a biala Hlimen, Melthum leh Saikhamakawn a tlawh a, ZMC-ah OPD tal hawn leh thuai a nih theih nan ZMC hotute a sawipui tih sawiin, "Harsatna dang a awm loh chuan kum thar January chawhnu lamah OPD hawn leh theih beisei a ni," a ti.

Chhamb Battle Honour Day
Ex Fighting 5th Association (EFFA) chuan December 11, Inrinni khan kum 1971-a India leh Pakistan indonaa 5th Assam Regiment-ten Chhamb indona, Battle of Chhamb avanga chawimawina battle honour an dawn kum 50-na pualin MZP conference hall-ah hun an hmang a, DDK news director Mangjangam Touthang-in a hmanpui a ni.

DC-in hawng
Champhai bawrhsap Maria CT Zuali chuan December 11, Inrinni khan AH&Vety department-in FOCUS project ‘Mithun Shelter Community Level and Water Supply Facility for Grazing Area kaltlanga North Khawbung rama sial in leh tuikhur siam tharte a hawng. AH&Vety chhinchhiah danin, North Khawbungah hian chhungkua 21-in sial 92 an vulh mek. Maria CT Zuali chuan, sial chu pipute hun aṭanga Mizote nuna bet tlat a nih avangin hlut nachang hriat a ṭul thu a sawi.