Positive hmuh belh

Zoram Medical College (ZMC) Covid-19 Laboratory-ah June 15, Thawhṭanni khan Covid-19 hripui vei mi pali hmuh chhuah leh a ni a; heti hian Mizoramah hripui vei tawh mi 121 an awm a, mi 120-in an vei mek. ZMC-ah hian nimin lamah pawh sample ṭhahnem tak endik leh a ni a, tukin zingah hian result puan chhuah leh a ni ang.

SRH-ZMC Covid-19 Bulletin nimin tlaia chhuakin a tarlan danin, Thawhṭanni khan ZMC, Aizawl district leh Kolasib district aṭanga swab sample dawn 705 endik a ni a, chu'ng zinga mi pali chuan Covid-19 an vei tih hmuh niin, mi dang 701 chu an fihlîm thung. Hripui veite hi Aizawl district-a mite an ni a, an vaiin State Referral Hospital (SRH)-ah dah luh nghal an ni.

Thawhṭannia hripui vei hmuh chhuahte hi mipa pakhat leh hmeichhia pathum, kum 24-30 inkar an ni a, tun hnaia Delhi aṭanga haw mi pathum leh Maharashtra aṭanga haw mi pakhat an ni. Quarantine facility-a khung hran lai vek an ni a, anmahniah symptom a lang lo vek.

ZMC Covid-19 Laboratory-ah hian nimin tlai dar 5 thleng khan swab sample endik tawh zawng zawng aṭangin sample 5,370 result hriat a ni tawh a, chuta ṭang chuan Covid-19 vei mi 120 hmuh chhuah a ni tawh. Mi 120-te hi June 1-15 chhunga hmuh chhuah an ni a, June 1 aṭangin ni tin hripui vei hmuh chhuah an la awm zel a ni.

SRH-ah hian nimin khan Covid-19 vei hmuh thar mi pali bakah, rinhlelh thilah mi pahnih dah luh thar an ni. Hripui vei mek mi 120 zinga mi 47 chu SRH-ah enkawl mek an ni a, mi 47 zinga mi pakhat chu ICU-ah enkawl niin, mi dang zawng chu Isolation Ward-ah enkawl an ni. ICU-a awm mekin ngai a awh tawh a, Isolation Ward-a awmte zingah harsatna nei an awm lo. SRH-ah hian damlo dang 12 an awm bawk.