Dr. Thangtea'n special economic package a dil

Minister Dr R Lalthangliana chuan December 10, 2021 khan New Delhi-ah sorkar laipuia hotu hrang hrang a dawr a, Covid-19 avangin special economic package a dil.

Commerce & Industries Minister hian Ministry of Micro, Small & Medium Enterprises (MSME) secretary BB Swain chu a pisaah kâwmin, MSME Minister leh Union Finance Secretary-te nena inkawmna bawhzuia kal a nih thu a sawi a; Covid-19 vanga harsatna tâwk Mizorama micro enterprise-te chhan chhuahna tur 'Proposal for Special Economic Package' pawimawhzia sawifiahin, "A hlawhtlin ngei theihna atan ṭan min lakpui ka duh," a ti.

MSME Secretary leh a thawhpuite chuan Dr R Lalthangliana ṭhahnemngaihna fakawm an tih thu an sawi a, theihtawp an chhuah tur thu an hrilh niin sorkar thuchhuah chuan a tarlang.

Dr R Lalthangliana hian MSME Secretary hnenah hian Industrial Growth Centre, Luangmual, Aizawl chu a ruhrel leh thil pawimawh dang tihphuisui a pawimawh thu a thlen bawk.

Health Minister hian Ministry of Health & Family Welfare secretary Rajesh Bhusan pawh a kâwm a; Mizoramin Covid-19 donaa hma a lakna a sawipui bakah, National Health Mission, Mizoram tana kum 2021-22 chhunga hman tur cheng vbc. 140 ruahman sa an sanction muang lutuk chu a ngaimawh thu a sawi.

Dr R Lalthangliana chuan, Covid-19 vei damlote mamawh damdawi man to leh váng Tocilizumab leh Remdesivir chungchang a sawi lang a; Health Secretary chuan Mizoramin a mamawh zat an thlen hunah a lo tihfel nghal tur thu a hrilh.

Ministry of Tribal Affairs secretary Anil Kumar Jha pawh kâwmin Dr R Lalthangliana chuan, Mizorama Tribal Industries Complex dinna tur chungchang te, health sub centre-te thuam ṭhatna atana hmalakna tur te, college zirlaite awmna tur tribal hostel sak chungchangte leh Ministry ofTribal Affairs kaltlanga hmalak theih thil pawimawhte a sawipui a ni.