Restricted area-ah Neihloh khua puang

Serchhip DC Kumar Abhishek Kumar chuan an district chhunga Neihloh khua chu Covid-19 vei hmuh chhuah thar an tam avangin tlawhpawh phal loh (restricted) area-ah December 11, Inrinni tlai khan a puang.

Chhungkaw 64 awmna leh mi 340 chenna Neihloh khuaah hian a ṭum khatna tan December 8, 2021 khan Covid-19 vei hmuh chhuah ṭan a ni a, December 11 thleng khan hripui vei mi 87 hmuh chhuah a ni tawh.

Neihloh khawtlang hian Middle School leh Primary School-te chu community covid care centre-ah an hmang nghal a, community hall pawh an hmang mek bawk. Hripui vei zinga pasarih chu Thenzawla Integrated Ayush Hospital-ah dah luh an ni a, mi dang 80 chu CCCC-ah an awm.

Thu dawn danin, Neihlohah hian hripui an vei leh vei loh la endik loh, in lama inkhung hrang zingah pawh Covid symptom nei an awm nual a ni.