Champhaiah KCC loan hrilhfiah

Sangha khawitute leh ran vulhtute’n Kisan Credit Card (KCC) loan an hmelhriat a, hamṭhatna an dawn theih nan Champhai district-a bank hrang hrang, AH&Vety leh Fisheries department-te chuan December 10, Zirtawpni khan CHANEM-ah KCC Camp an buatsaih. KCC loan hi Rs 1,60,000 chinah security leh guarantor ngai lo a ni.

KCC Camp-ah hian banker leh line department nodal officer-te chuan KCC loan la tura inkaihhruaina leh a kalphungte an sawifiah. Loan dil tumte chu loan rulh ngai pawimawh tur te, a nihna ang ngeia hmang tur te, rûl ṭha lo tan ngaihven loh a ṭhat thu te, 7%-a a pun thu leh loan rulh hun chhunga rul ṭhate lawmpui nan interest subvention 3% a awm thu te, nodal department leh bank-ahte dilna thlen theih a nih thu leh KCC loan chu Rs 1,60,000 chinah security leh guarantor a ngaih loh thute an sawi a ni.

Mahila Shakti Kendra, Women Cell-te’n KCC loan lak tum hmeichhiate tana hriatfiah awlsam turin KCC loan chungchanga hriattur ṭulte Mizo ṭawnga lehlin an sem nghal bawk.

Kum 2020-21 chhung khan AH&Vety department kaltlangin mi 140 leh Fisheries department kaltlangin mi parukin KCC loan an dil a ni.