Covid-19 vangin mi 521 thi tawh

Nimin khan tlai dar 5 thlengin Covid-19 vangin mi panga an thi a; December 9-11 inkara thi tarlan thar pali a awm bawk. Nimin tlai dar 5 thleng khan Mizoramah Covid-19 vangin mi 521 an thi tawh a, December thla chhungin mi 24 an thi tawh.

Sorkar thuchhuah tarlan danin, December 9, Ningani zan dar 10:30 khan Thangṭhuami (90), Zotlang, Aizawl chu Covid-19 vangin a thi. Covid-19 vei a ni tih December 4, 2021 khan hmuh chhuah a ni a, in lama enkawl lai niin, natna dang nei tel a ni.

December 10, Zirtawpni zan dar 9:45 khan Lalrinchhana Ralte (55), Chanmari West chu State Refferal Hospital-ah a thi a, natna dang nei tel a ni. Covid-19 a vei tih November 24, 2021 khan hriat chhuah a ni a, SRH-ah dah luh nghal a ni tih sorkar thuchhuakin a tarlang.

December 11, Inrinni zing dar 12:30 (Zirtawpni zan) khan Lalthangpuii (91), Thingsulthliah chu SRH-ah a thi a, natna dang nei tel a ni. Covid-19 positive a ni tih November 24, 2021 khan hmuh chhuah a ni a, November 30 aṭangin SRH-ah enkawl a ni. Inrinni vêk zing dar 4:43 khan Lalruata (82), Khawzawl Darngawn Veng chu CCC-ah a thi a; hripui a vei tih December 10, 2021 khan finfiah niin, natna dang nei tel a ni.

Nimin khan chawhma dar 11:40 khan Lalfaki (65), Tanhril chu SRH-ah a thi a, Covid-19 positive a ni tih December 5, 2021 khan hmuh chhuah niin, SRH-ah dah luh nghal a ni. Chawhnu dar 2:15-ah Doṭhuami (77), Lunglei chu SRH-ah a thi a, hripui vei a ni tih November 26 khan hmuh niin, natna dang nei tel a ni.

Nimin chawhnu dar 2:20 khan Vanchamliana (67), Lunglei chu hripui vangin SRH-ah a thi a, Covid-19 vei a ni tih November 19-ah hmuh niin, November 26-ah SRH-ah dah luh a ni. Tlai dar 2:25-ah Hrangtinzuala (67), Aizawl Venglai a thi a, hripui vei a ni tih December 1-ah hmuh a ni. Lalchungnunga (65), Serchhip pawh tlai dar 3 khan SRH-ah a thi a, hripui vei a ni tih December 8-ah hmuh a ni. An pathum hian natna dang nei tel vek an ni.