Expert Team-in Health Minister-ah an zir chianna leh rawtna an thehlut

Lunglei Civil Hospital (LCH)-a Reverse Transcriptase Polymerase Chain Reaction (RT-PCR) Diagnostic Laboratory din theih dan tur zir chiangtu Expert Team-te chuan nimin khan Health minister Dr R Lalthangliana hnenah an zir chianna leh rawtna an neihte an thehlut.

Health & Family Welfare Minister chuan, Expert Team-in an thil hmuh dan rang taka an thehlut chu lawmawm an tih thu a sawi a, "Lungleia RT-PCR Diagnostic Laboratory din vat hi sorkar duh dan a ni a, mahse, a behbàwm leh a ken tel thil dang dang bakah, ICMR phalnate a ngaih avangin páwngpaw hmanhmawh ngawt theih a ni lo," a ti.

Expert Team-te chuan, RT-PCR Diagnostic Laboratory din turin RT-PCR neih hnuah pawh a behbâwm kháwl dang chi hrang hrangte lei a ngai a, ICMR aṭanga phalnate a ngaih avangin hun a la duh rei deuh tur thu an sawi.

Tarlan tawh angin, Expert Team-ah hian member pathum - Dr H Lalhlenmawia (RIPANS), Dr Vanramliana (PUC) leh Dr John Zothanzauva (MZU)-te an awm a; June 15, Thawhṭanni khan Lunglei Civil Hospital an tlawh a ni.