MNF sorkar hi kan ti ang an tih apiang Kalh zawnga thil tih chíng a ni - MPYCC

Mizoram Pradesh Youth Congress Committee (MPYCC) chuan thuchuah siamin, December 11, 2021 kha Citizenship Amendment Act (CAA) avanga Mizoram leh hnam MNF-in an phatsan champha kum hnihna a nih thu an tarlang a, “MNF sorkar hian kan ti ang an tih apiang kalha thil tih chíng an nihzia Mizo mipuite’n i hre nawn ang u,” an ti.

Congress ṭhalaite chuan, Mizoram history-a ni lungchhiatthlak ni kumkhua tawh tur, Parliament-a Mizo hnam leh sakhaw him lohna tur CAA lam ṭana MNF leh Mizo mipui aiawh Lok Sabha MP C Lalrosanga’n bán a phar ní chu hre reng tur in mipui an chah a, “Lalna duh vanga hnam leh sakhaw hralh duhtute thil tih dan hi ṭhang leh thar lo la awm zel tur hnenah kan fimkhur zawk nan i hril chhawng zel ang u,” an ti a; MNF-in kum 2018 inthlanpuia Mizorama sorkarna an siam theih chhan chu BJP spokesman Mmhonlumo Kikon-in a sawifiah tawh thu an tarlang.

MNF party chu Hindu lal ram siam tumtute thawhpui luitu an nih chianzia zêp rual loin pho lan a ni tawh tih sawiin MPYCC chuan, “MNF sorkarah kan hnam zia, kan sakhua himna leh zalenna beihna a tâwk zel a ni. Kan him lo tial tial a ni tih i hre thar ang u. Kum 2019-a MP inthlanah MNF khan na taka CAB do an aupui a, kum chanve tlin hmain an thu aupui an theihnghilh lui a ni. CAB thlawptu mai ni lo, CAB/CAA vanga Parliament meuha Mizoram mipui aiawhtuin lawmthu a sawi ta zawk kha thil rapthlak tak a tling,” an ti.