Education Minister-in zirna tibuai zawnga Programme siam lo turin NGO-te a chah

School Education minister Lalchhandama Ralte chuan, zirlaite zirna tibuai thei zawnga programme siam lo turin khawtlang hruaitute a chah.

Saipum Primary School-I kum 100 tlin (centenary) lawmna a hmanpuinaah Lalchhandama Ralte chuan, “Sorkarin zirna hi a dah pawimawh em em a. Hripui léng avangin kum hnih chhung chu duh angin hna a thawk chak thei lo a, sum harsa chung chung pawhin kan ramin zirna ṭha a hmuh theih nan tiin sorkar chuan chak takin hma a la mek zel a, zirtirtu 2,000 dawn lak a ni tawh,” a ti.

Education Minister chuan, tunlaiah social media a chak tawh hle tih sawiin, “Hemi kawngah hian zirlaite’n a tâwk an hriat a, zirna tibahlah zawnga an khawih nasat chuan zirnaah hlawhtlin loh a hlauhawm,” a ti a; zirna lama anmahni pui thei turin a ṭangkai zawnga social media hmang thiam turin zirlaite a chah.

Bialtu MLA Lalrinsanga Ralte pawhin thu sawiin, “Zirlai naupangte’n taima tak leh tumruh taka lehkha an zir chuan Saipum aṭang hian sorkar officer lian tam tak tak an chhuak thei a ni tih hriat a pawimawh,” a ti.

Saipum Primary School-I ah hian zirtirtu pali leh zirlai 142 an awm mek a ni.