Chief Minister-in Myanmar hruaitu Mizorama rawn ráltlânte a kâwm

Chief minister Zoramthanga chuan nimin khan Chief Minister's Office conference hall-ah Myanmar buaina avanga Mizorama rawn lut Myanmar ram hruaitute a kâwm a, ráltlânte tan Mizoramin theihtawp a chhuah zel tur thu a sawi.

CM Zoramthanga chuan, Myanmar ram buai avanga mipuiin harsatna naménlo an tâwk chu pawi a tih thu sawiin, "Mahni sahimna zawnga ram rawn lutte chu Mizoram chuan chhawmdawl turin theihtawp a chhuah. India sorkar hotute bulah pawh ráltlânte chhawmdawl chungchangah vawi tam sawipui tawhin, tun hnaia Prime Minister leh Home Minister ka hmuh ṭum pawhin tuamhlâwm an mamawhzia ka sawipui a ni," a ti.

Myanmar ramah mipui sorkar ngêlnghet tak din tura an entawn tur ṭha ber chu India ram a ni tih sawiin Zoramthanga chuan, "Sorkar laipui hotute hnenah India ramin Myanmar chu a ensan theih loh thu ka hrilh," a ti a; sorkar laipui hotute pawhin a thusawi chu an ngaihven niin a sawi.

Kum 10 dáwn kal taa Myanmar ram sorkar leh ramhnuai mite inkara inremna a awm theih nan ruahmanna a siampui tawh tih sawiin CM Zorama chuan, "A karah thil hrang hrang thlengin, beisei loh harsatna a awm hi a pawi hle. Hun rei vak loah democracy hi Myanmar-ah tun din a nih leh ngei ka ring. Theihtawpin huaisen takin in tan kan bei zel ang," a ti.

Chief Minister chuan, harsatna an neih chuan a theih chin chinah sutkiansak dan ngaihtuah zel a inhuam thu Myanmar hruaitute a hrilh a, inunauna nghet leh ṭha taka a awm theih nan Mizoram mipui leh Myanmar unaute chu theihtawp chhuah tlang zui zel turin a sáwm.

Myanmar MP-te chuan, Mizoramin ṭha taka lo dawngsawng a, mipuiin an lo tuamhlàwm avangin lawmthu an sawi a; sorkar, tlawmngai pawl, zirlai pawl, kohhran leh mipuiin an tana hma an lakna zawng zawng chu ropui an tih thu sawiin, "Ráltlân ang ni lo, inpuia lo lut ang mai kan ni," an ti a, harsatna an tawhte leh thu pawimawh dang Chief Minister an hrilh a ni.