KṬP General Conference neih phalsak, Inkhawmpuia kal thei zat bithliah a ni
Kolasib district magistrate Dr H Lalthlangliana chuan March 3-6, 2022 chhungin Kolasib-ah KṬP General Conference vawi 59-na neih phalsak a nih thu tun hnai khan a tarlang a, inkhawmpuia zawm tur a siam nghal bawk. Central KṬP pawhin General Conference-a kal thei zat tur a tichhuak tawh.
Bawrhsap Dr H Lalthlangliana chuan, KṬP General Conference hi a thlengtu, Organising Committee-in a dil angin phalsak a nih thu a tarlang a, "Hemi atan hian a ṭul anga hmalak pawh phalsak nghal an ni," a ti. Inkhawmpuia hman tur inkaihhruaina kimchang chu a hun dawn hnaiah Covid-19 dinhmun thlir chunga siam tur a nih thu a tarlang.
Central KṬP chuan General Conference-a kal dan turah ruahmanna siamin, branch tinah a thawn chhuak tawh a, "Kum dang angin member náwlpuia kal chu remchang lo leh hri lakah pawh him loah a ngai a, branch khata member awm dan azirin kal thei tur zat ruahmanna a siam a ni," a ti a; kal thei tur zat hian bial zaipawl zai tur member-te leh special item nei turte a huam lo.
CKṬP tarlan danin, inkhawmpuia kal turte chu Covid-19 vaccine la kim tawh ni thei se, an ti a; a thlengtu Kolasib mipui tel loin palai zawng zawng mi 10,000 vel ni thei tura ngaih a ni.
Kolasib DM-in zawm tur a tarlante
1) Palai a tlem thei ang ber inkhawmpuiah kal ni se.
2) Palaite chu inah thleng lo a, kohhran hall leh community hall-ah a tam thei ang thlentir zawnga hmalak ni se.
3) Inkhawmpuiah CAB ṭha taka kalpui a nih theih nan ruahmanna ṭha tak siam lâwk ni se.
4) Pandal sak hnatlangah CAB ṭha taka zawm tur a ni.