Mizoram budget aṭang loin SEDP Sem ni ngei rawh se - ZPM Ṭhalai

ZPM Ṭhalai hruaitute chuan nimin khan Aizawl Press Club-ah thuthar thehdarhtute an kâwm a, MNF-in an intiam ang ngeiin SEDP sem ngei se an duh thu sawiin, "Mizoram budget aṭang erawh chuan sem suh se," an ti.

ZPM Ṭhalai hruaitute chuan, kum 2018 inthlan­puia MNF-in an intiamna, SEDP hnuaiah Rs. 3,00,000 aia tlem lo, nuai thum chung lam sem chu an term tàwp lamah a taka kalpui a nih tur thu an sawi ṭan chauh tih sawiin, "Tih loh tawp aiah chuan a ṭha hrim hrim a, a taka kalpui a nih hun Zoram mipuite'n kan lo nghâk mêk a ni," an ti a; ZPM party chuan sum fai sem chu mipui rilru leh sûkthlêk tichhetu a nih avangin an duh loh thu an sawi.

MNF-in sum sem an duh avangin an intiam ang ngeiin an sem ngei tura an duh thu sawiin ZPM ṭhalaite chuan, "Hetih rual hian, Mizoram budget aṭanga sem a nih erawh chuan, tuna kan CM-in opposition an nih laia fiamthu thawhna atâna NLUP a lo hman tawh ang, 'Thlám bang chhak lam sah thlâk a, bang thlang lama bel, a sahthlâk lama awmte chu ruah sur leh khawvawt tuara khur char chara awm' a tih nen khan SEDP hi thuhmun reng a ni dawn a ni," an ti.

ZPM Ṭhalai chuan, SEDP chu CM-in a lo sawi tawh budget páwna mi, khurpuia khawh lût chur chur, thàl sên loha liam zur zura mi ngei thàla sem an phut thu sawiin, "Mipui retheihna belhchhah turin Mizoram budget aṭanga sem lo turin kan chah a ni. SEDP hi Congress NLUP ang khan a al châk tawk lekin an sem ang tih kan hlau hle," an ti a; mi harsa zawkte tâna din chhuahna tak tak tur ni lo, hmai phih faina ang leka instalment-a sem ṭha an tih loh thu an sawi bawk.